房協馬鞍山曉峯灣畔代理銷售戰結束，美聯贏咗對手中原，美聯噚日就登咗一個全版廣告，用通勝春牛圖做主角，帶出「美聯物業通勝」，主力講美聯響曉峯灣畔勝出，重列埋其他贏出嘅一手盤資料。美聯向蘭西表示，呢個廣告係由企業傳訊部、公關部同公司嘅設計師聯手諗出嚟嘅，取其「贏晒」嘅意思，佢重話咁樣，啲人先至有興趣睇埋內文。聽講呢個廣告會響美聯分行櫥窗張貼一段時間。不過中原就質疑美聯條數應該係計埋啲「艇仔票」先贏到佢哋。
新地同太古發展嘅將軍澳維景灣畔3期，本周一獲批預售書，今日就匆匆開記者會講開售安排，今次太古有馬淑貞同簡基富出席，新地就出動周國賢同郭炳江，兩大發展商對呢個盤有幾重視不問而知。
另蘭西噚日收到太古送嚟嘅資料，當中有買家最關心嘅物業平面圖，同各座單位面積及分布資料；另有一本珍藏版「書仔」，以小朋友為中心，講嗰盤各種設施同優點；此外，重有兩個杯墊，點解兩個？相信係代表兩個發展商。
另外，美聯響禮拜一同同事慶祝完，噚晚就輪到沙田區同事筵開20席慶祝。
廖創興噚日搞咗個傳媒海上睇樓團，好多報館都有派人採訪，諗住響海面影吓個樓盤嘅靚相，結果發展商先安排大家到列為保護區嘅海岸公園印洲塘睇吓，但可惜就上唔到岸，更加睇唔到發展商個樓盤。正當記者疑惑之際，發展商代表就開古，原來係老闆希望將呢度嘅寧靜帶到九肚山，所以等記者都可以感受吓。另發展商又安排記者到吉澳食晏，但食肆嘅老闆娘就以為係學生嚟旅行。
蘭西