恒指跌43點，其中有29點係長實（001）同和黃（013）總共除息80.3億元所拖低，扣咗呢項因素，恒指實際跌好少，只係14點。
恒指實際跌14點，新地（016）跑輸大市好多，上晝收67元，下晝收65.75元，全日唔見1元，跌番落上禮拜五低位。
由月頭最高位71元起計，新地調整咗5.25元，差唔多嘞，有機會反彈。係時候揀新地Call輪短炒。
新地Call輪9115係當然主角，高開76仙，低收66仙，跌8%。由月頭高位1.05元起計，跌幅37%。遲吓新地向政府勾地，屬於好消息，對股價會有刺激，揸9115，望上番去80仙嗰頭。
唔知乜嘢原因，港交所（388）同地鐵（066）好多時都共同進退，港交所是日進帳2格，地鐵進帳1格。
地鐵將軍澳支線快將提前通車，估計有少少刺激，啲Call輪可以留意。
地鐵兩件Call輪，9146冇成交，9207有啲成交，明年4月到期，現價24.6仙，溢價1.8%，槓桿率4.8倍，數據靚，搵啲揸吓無妨。 章盛