老董過去五年頭頭碰着黑，今次喺冇人肯參選嘅情況下順利連任，自然想係威係勢咁搵中央領導人嚟香港祝福佢多五年。雖然一直傳聞今年「七一」江主席會親自南下，但最高領導人嘅行蹤絕對係國家最高機密，所以到今時今日，無論特區政府定係中聯辦都唔肯講多半句。
不過，噚日竟然有人夠膽將江主席訪港嘅消息以傳真唱通街，邊個咁夠膽洩露國家最高機密呢？原來係《文匯報》！八方老友噚日收到一份題為《熱烈歡迎江澤民主席蒞臨香港暨慶祝香港回歸五周年特輯》嘅傳真，除咗話到明江主席會喺「七一」當日「蒞臨香港，與港人共慶」之外，原來主要目的係為呢份特輯收廣告，廣告費由全版彩色三萬八到三十六分之一版黑白七百蚊都有，豐儉由人。
E-mail：