中國國家隊熱身賽贏泰國隊，有人話中國隊表現未見特別，更有人話中國隊贏世界盃機會渺茫。
前幾日八方見到香港足球總會會長霍震霆，佢就完全唔同意呢個睇法。原來，小霍四月尾專程飛咗去韓國仁川，睇中國對韓國嘅熱身賽，雖然呢場比賽雙方互贈鴨蛋，但小霍就大讚中國隊士氣好，水準亦不錯。
講到嚟緊嘅世界盃，尤其係六月四日開始嘅中國隊賽事，小霍就實牙實齒咁話，自己身為香港足球總會會長，及係國際奧委會委員，一定會去韓國捧場。
咁佢老竇霍英東呢？會唔會兩父子齊齊去睇波？點知小霍好體貼咁話，佢老人家咁大年紀，唔適宜咁頻撲，不如舒舒服服啲，坐定定留番喺香港睇電視轉播算啦。
咁又係，𠵱家世界立立亂，呢度又有恐怖活動，嗰度飛機火車又頻頻出意外，都係由大無畏嘅小霍代父出征好過。
E-mail：