經紀陳噚日叫小初留意隻冷門股中國發展（487），佢話隻股食住光通信（603）狂炒餘威，可以諗吓。
小初知道呢隻股早排已經郁動過，但成交好細，所以冇當真。
經紀陳話，原來中國發展嘅大股東，係一位來自寶島嘅林先生，但自佢買殼以來，除咗買dot.com供過一次股外，唔見再有其他動作。上星期睇報紙，佢先至發現林先生做咗光通信董事，由於光通信呢排當旺，所以憧憬中國發展有機會炒番轉。
雖然經紀陳呢個炒作理由極為牽強，但隻股噚日真係無厘頭炒過一陣，早市最高抽上去7.5仙，收6.4仙，升28％，但成交真係好少，只得百餘萬元。
小初另外聽到一個傳聞，就係隻股有機會放盤求售，究竟今次係經紀陳啲料堅定係小初嘅料堅，真係要睇吓先知。
至於隻股買唔買得過？小初就情願坐定定睇戲好過啦。
慕容小初