最近，立會議員梁劉柔芬攞到美國伊利諾大學「傑出校友成就獎」，八方先知除咗佢之外，原來重有兩位立法會議員都係畢業於呢間大學，分別係最近盛傳會入行政會議嘅田北俊，同埋丁午壽議員。除咗係校友，佢哋三個重同樣係自由黨黨友，但佢哋讀嘅科目就完全唔同，梁太六九年電腦系畢業，其餘兩人都係六八年工程學畢業，不過，丁午壽讀機械工程，而田少就讀化學工程。
講到對母校感情，丁生、田少就比唔上梁太。梁劉柔芬唔止設立基金，支持母校教研人員訪問香港大學，連對香港伊利諾大學校友會活動都出錢出力。唔怪之得佢成為第一位得呢個榮譽嘅亞洲女校友。上個星期六，梁太已經親身飛咗去美國攞獎，明日先返，到時校友會會宴請一眾校友同梁太慶祝，當然唔少得田少同丁生。
E-mail：