「如夢」蔣怡與「如花」李健仁在生力啤廣告中扮演同一人，想不到現實生活中他們亦是同月同日生，昨日兩人一同在柴灣拍攝瘦身廣告時，蔣怡更不禁大叫「好邪」。
蔣怡（CoCo）因在新一輯的生力啤廣告中扮演「如夢」一角，而與「如花」李健仁開始熟稔，想不到原來兩人同於前日生日，十分有緣。
CoCo昨日穿上一件白色旗袍，再次與其「好姊妹」李健仁合作，兩人在柴灣某影樓為瘦身品牌「NiteSlim」拍攝硬照廣告，廣告公司更專程為同月同日生的CoCo及李健仁送上蛋糕及利是。
現年二十五歲的CoCo昨日笑說：「我同如花（李健仁）真係好有緣，竟然同一日生日，好邪！初初啲工作人員講我都唔係好信，估唔到𠵱家重一齊拍廣告！噚日生日我都冇特別慶祝，因為做咗成日嘢，男朋友送咗一隻金毛尋回犬畀我，而我自己就趁噚日行catwalk嗰陣，買咗件幾百蚊嘅泳衣畀自己。」
問CoCo何以如此慳儉，她說：「我不嬲都好慳，只係捨得用喺食同去旅行，自從拍完生力啤廣告之後，公司同我提高咗身價，但唔敢抬太高怕嚇走啲人，我都想拍戲，可惜自己太高，好難搵對手。」
此外，年屆四十的如花李健仁昨日照樣男扮女裝，他說：「雖然我已經扮咗幾十次女人，只要大家鍾意就得，我今次酬勞有六位數字。」