「仔阿仔有書唔讀究竟你幾時先至生性？」面對兩位近日學聯風頭躉馮家強與盧偉明，不期然想起這句汽水廣告歌。有人以為兩位大學生只談「高、大、空」理想，不諳世情，甚或浪費納稅人金錢。其實二人只不過是希望跳出框框，在象牙塔以外關心社會事務，站在前線付出一點力量……
記者：陳淑君
攝影：陳智良（部份圖片由被訪者提供）
馮家強小檔案
年齡：23歲
學歷：香港中文大學政治及行政學系四年級
家庭狀況：父母及一兄
現職：學聯代表會主席、綠色和平義工
盧偉明小檔案
年齡：26歲
學歷：嶺南大學文化研究系三年級，副修繙譯
家庭狀況：父母及一弟一妹
現職：學聯財務秘書、嶺南大學學生會代表會成員（委任代表）
近年在公仔箱見到阿強(馮家強)，都是出席遊行集會，即使幾天前才與Chris(盧偉明)被捕，翌日二人又繼續請願示威去，記者問遊行示威是否已成生活的重心，阿強即時反駁：「其實喺香港，遊行機會不多，佔咗平時生活一成都唔夠，反而花較多時間喺學聯開會傾嘢」。阿強今年快將畢業，雖然現只保留學聯代表會主席一職，依然要花上一半私人時間！Chris改做財務秘書，一樣佔據九成時間。「我好多時都冇覺好瞓，成日開通宵，食飯無定時，一日只食得一餐。」幸好有的是青春，充電兩日又可再次搏鬥。
長期處於戰鬥狀態，不疲累嗎？「如果短視衡量成果，一定會覺得攰，會覺得唔知做緊乜，一來做呢類事件(社會運動)不能太過計較成果，我亦好清楚整個過程好漫長，不會因為今年做唔到就覺得失敗。早兩年我出嚟遊行時，啲人重話緊我阻街，但今日一發生事故，第二日就有人討論，講緊係咪依法辦事，講緊(警察)有冇權，事件咁快有反應，證明啲巿民係進步緊，日漸成熟，只要態度正確，冇錯誤理解遊行作用，根本唔會有挫折。」阿強淡然的道。至於Chris，每當遇到心灰之時，也頂多「暱埋幾日唔見人狂瞓幾覺，就可以安然無事。」
沒有比集會遊行更有效反映意見的方法嗎？「在這個不理民意的政府下，街頭表達係冇得選擇下的一個選擇，可不經過濾表達意見。」阿強解釋。
人生總要選擇，不易兩全其美，阿強好清楚自己的取捨。「我讀小學時年年考第一，初中亦如此，但由中二開始，我透過校報接觸社區組織，知道更多社會問題。攞第一有乜意義？學校學到嘅知識，根本經過老師與課本過濾，不全面甚至係假，其實幾大部份知識都係嚟自經驗，對日後處事更有用。阿媽雖然嘮叨，老師也有問，但自己覺得值得，冇所謂。」面對別人罵有書唔好好讀，他總駁斥：「我有讀書㗎，科科都及格！大學生也是社會一分子，見到唔啱應該出聲，每人只顧各安其位，豈不是冇人關心社會？」
中學時修讀理科，入讀中大最初也修生化系，隨着興趣轉移，他改修政治，所學亦大派用場。
Chris為人低調，喜歡獨來獨往，跟阿強一樣於中學時期只去過六四燭光晚會，直至入讀嶺大，深感學校政策不以學生為先，才毅然投身學生會，還當過會長，兩年來忙個不停，根本沒有時間好好讀書，但他覺得參與社會運動最吸引就是實踐。
「自己可以將想到嘅嘢試出嚟，包括Lineup啲人做嘢、搞行動等，雖然未必好開心，但整個過程好有滿足感！發生咗事上網ICQ時有不少舊朋友問候，雖然朋友未必做到啲乜，但簡單一句問候已經令我好開心！」
經常出入學聯、參加遊行示威，所花交通費比一般學生多，被落Charge更要付保釋金，兩人財政負擔不輕。阿強謂：「早幾日被警方檢控時，畀五百蚊保釋金已等於一個星期嘅零用，屋企唔係有錢，惟有向朋友借。這兩年一發生事故，都要靠周圍問人籌(錢)，嚟緊若果要打官司，惟有搵朋友義務幫手。」
兩人都稱盡量慳啲使，Chris更笑說自己「爛身爛世」。「我平時着嚟着去都係幾件衫，爛都照着，啲朋友睇唔過眼，寧願送過啲新衫褲畀我！𠵱家着緊對涼鞋都係最近朋友喺學聯附近街巿檔買咋！」
無論點慳，他們至少要面對政府借貸一筆。阿強還好只欠政府十二萬，Chris就「甘」得多。原來他入讀嶺大時修讀繙譯，第二年轉修文化研究，被迫「重新」入學，加上搞學生會又停學一年，足足要五年時間才可畢業，由於家人不願向政府申報資料，他被迫要申請(免入息審查)高息貸款，五年學費竟接近三十萬，雖然他謂「政府錢唔急還，拖得就拖」，但保守估計要十年先還得清！至於平日開支，Chris則要靠幫人做繙譯和補習幫補一番。
阿強已不是第一次面對警方指控，早已有心理準備，「最高刑罰係坐監五年，家人當然擔心，不過坊間一般都話唔會。」有沒有向長毛請教坐監情況？「唔使咁快，有排都未審！」去年阿強因抗議基因食物而留有案底，但對自身前途依然樂觀。
「我比較關心集會自由、勞工權益及環保問題，畢業後希望到民間團體工作，也希望僱主支持我嘅信念，做一啲令社會進步嘅事。社會最大問題係帶頭搞分化，將爭取居港權人士、公務員、醫生、攞綜援人士包裝為人民公敵，再被人批鬥，製造更多戾氣。」
阿Chris則一向關心教育理念，除同樣希望日後到民間團體工作外，當教師或從事繙譯工作一樣可以貫徹理想。對香港前途卻覺暗淡非常。「政府𠵱家好似倒退到七十年代，雖然(集會)無用警棍打人，但卻出動胡椒噴霧；教育只講經濟效益，完全本末倒置，學生唔會有創造力，亦唔夠競爭力，咁差嘅教育制度，白白浪費年輕人二十年青春，你重點期望佢哋？單一社會冇希望，連曙光都睇唔到！」
2002年5月 兩人被警方指控舉行以及協助於2月10日未經《公安條例》批准的公眾集會，各以$500保釋，案件押後到23日再提訊。
2001年8月 馮因參與綠色和平於同年5月抗議雀巢公司使用基因食物，被控阻街及阻差辦公，被判罰款$900及留案底。
2001年1月 嶺大校長陳坤耀計劃實施五項規管學生的規條，盧指學生因學費高昂而須賺錢還債才致上課遲到打呵欠，言論惹來陳校長狂轟。
2000年6月 二人與爭取居港權人士往政府總部靜坐，警方以阻塞通道妨礙公務員上班為理由，採取清場行動，其間警員使用胡椒噴霧及追打請願學生。
2000年4月 馮與50多名學生由灣仔遊行至中區政府總部教統局，反對港府有意實施大專分科收費。