港股近期走勢似自成一格，不太受外圍影響，如果長期係咁，趙飛雲唔使捱更抵夜睇美股，其實係好事。不過，相信以上只係短期現象，今個月期指未平倉合約高逾5萬張，大戶睇住呢個大彩池做嘢，當然喺有需要時唔使太在意外圍點走。
恒指噚日升87點，收11733，主要由地產及銀行股帶動。上周六提過幾隻地產大藍籌股已跌近支持位，將有反彈支撐大市。上周日房協馬鞍山曉峯灣畔1日售清1124個單位，好友自然乘勢抽高地產股，此外高盛調高滙豐（005）投資評級至「跑贏大市」，長實（001）宣布分拆長科，亦刺激兩股做好，如果唔係尾市地產股升幅收窄，恒指唔止升咁少。不過，港股現時可上可落，想穩陣，應等出現突破後才買貨。
趙飛雲冇貨手痕，噚日本來想買番啲長實Call輪9043，但諗起長實今日除息，加上估計恒指短期整固為主，所以忍一忍手。長實除息後可留意走勢，因現時未盡反映分拆長科概念，可以優先留意，短期若見守穩74元，可伺機追入長實輪9043。另外，滙豐自4月中展升浪以來，10日線從未失守，短期若見跌近94.50元，可考慮先買1注滙豐Call輪9040。
趙飛雲