炎炎夏日食件冰凍嘅西瓜實在係人生一大樂事，西瓜水分多，消暑夠解渴。西瓜種類多，淨係台灣進口都有兩、三個唔同品種，除黑美人、黃肉西瓜等之外，今年最新嚟咗一款叫蜜糖嘅西瓜，佢比黑美人重嬌小，一個大概兩磅重，果肉較淡色，但食味如其名非常甜，有核但唔多。蜜糖西瓜Size細細，最啱人數少嘅家庭食。
部份果檔有售
鈣質對人體嘅骨骼成長好重要，尤其是好似我哋啲生過BB嘅女士，鈣質特別容易流失，唔吸收多啲鈣又點得呢！我平時間中都會飲吓鮮奶，但又怕飲得多會肥，最近俾我搵到呢款由韓國入口嘅一款綠茶豆奶，佢唔單止低脂，而且重鈣質豐富，因為係大豆成份，豆味好濃郁，加咗綠茶，飲落更清。怕奶嗰陣腥味，飲呢款豆奶同樣可作為補充鈣質。
店名：一斤店
地址：觀塘廣場M49號舖
電話：24499843
傳統湯勺都係圓形或橢圓形嘅，今日要介紹嘅呢個新款湯勺則係半圓形，佢好處係可以直立式擺放，𢳂完湯就咁可以企放枱面，比一般傳統湯勺只可以掛起或要用湯勺座輔助至能企直放，呢個新款湯勺就方便得多，佢同樣可以掛起，同樣慳位。直立式湯勺由日本入口，湯勺採用不銹鋼物料，直徑約7厘米，手柄位則可耐熱110°C，採用弧形設計，就番手位，攞上手又夠舒適。
銷售點：銅鑼灣三越百貨地庫家品部
文：肥師奶