黃子華舊愛劉婉君（Sharis），早排宣布出年一月會同拍拖幾個月嘅廣告界男友Bosco結婚。
咁啱得咁蹺，馮仁昭喺Sharis宣布完婚訊之後第二日，喺銅鑼灣V-Mix卡拉OK撞見佢同未婚夫。着上低胸透視裝嘅Sharis，同Bosco又攬又抱去唱K，認真甜蜜。
馮仁昭諗住問吓準新郎嘅心情如何，點知佢即時好怕羞咁用個咕𠱸遮住自己，然後話：「唔好問我啦，我重未求婚㗎！」馮仁昭聽咗之後當堂打咗個「突」，心諗唔通劉婉君話結婚只係一廂情願？後尾Bosco解釋，話其實佢哋事前有坐低傾結婚呢個問題，只不過佢重未正式跪地求婚啫。
原來目前已經有唔少婚紗店打佢哋主意，話贊助婚紗同禮服畀佢哋，但由於重有大把時間，佢哋慢慢揀都未遲。
黎明因為瞓身幫有線宣傳世界盃，激嬲咗無綫，所以嚟緊嘅《萬眾同心公益金》節目，無綫已經決定將黎明飛出局，改由陳慧琳同謝霆鋒孭重飛。不過，馮仁昭知道無綫為咗畀番啲面公益金，所以喺節目舉行嗰晚，會播出黎明幫公益金做善事嘅片段，等大家都好落台喎。
陳淑蘭（蘭子）自爆同黎明有一段情，噚日佢返港台做節目嘅時候，話見到黎明一定會迴避，事關佢係黎明超級fans，未見佢已經好緊張，見到真人嘅話一定連個心都會嘔埋出嚟。佢又話呢幾日收到黎明fans嘅來信，話會支持蘭子，但港台啲DJ就取笑佢話，其實啲fans咁做係為咗減低蘭子嘅戒備心，等遲啲將啲屎塞入佢個口喎。
張栢芝同古天樂套《絕世好B》原本呢幾日要去日本拍外景，但因為世界盃舉行在即，日本方面唔會好似平時咁，可以好方便就攞到工作證，所以𠵱家部戲有好多工作人員攞唔到工作證。中國星初時都冇諗到會受世界盃影響，結果大隊要下月尾先會去日本補拍，咁呢部戲惟有拍晒香港啲戲份先。
無綫藝員余子明個愛子，大前晚喺尖沙嘴洲際酒店補擺結婚喜酒。馮仁昭噚日打電話恭喜余子明嘅時候，佢心情不知幾咁興奮。子明哥話佢個仔舊年已經喺加拿大註冊，大前晚係請番香港啲親友飲喜酒，陳寶珠同佢媽咪宮粉紅，同埋無綫高層何定鈞都去飲喜酒，子明哥話佢哋咁畀面，心情梗係興奮到不得了啦。
滕麗名同馮仁昭真係好鬼有緣，前排馮仁昭又喺將軍澳新都城商場度，見到滕麗名一個人行街，當時佢手上攞住兩大袋Fancl嘅纖體飲品SlimUp，估計佢起碼買咗成六、七盒。雖然啲纖體飲品好鬼重，但滕麗名都肯一次過攞住咁多返屋企，唔通佢真係好心急減肥？
樊亦敏噚日喺尖沙嘴文化中心出現，問到早前羅兆輝被入稟法院追討欠債，樊亦敏有冇借過錢畀羅兆輝？佢話：「我冇咁嘅資格，亦唔會問呢啲嘢，大家十幾年朋友都會電話問候關心吓，大家都有保持聯絡。」記者再追問羅兆輝係咪佢心目中嘅理想對象？樊亦敏話：「佢係我朋友，從來冇諗過，我對朋友同男朋友之間分得好清楚。」
由內地《南方都市報》舉辦，二○○二年度第一季「華語流行樂傳媒大獎」日前已經公布咗得獎名單。結果相信大家估都估唔到，最佳男藝人大獎竟然係由黃秋生以《BadTaste》大碟奪得，壓倒陳奕迅同黃耀明等歌手，真係可以話爆大冷。另外，黃耀明就以《PrettyHappyandGay》奪得最佳大碟。