經過三次喺升班附加賽功虧一簣之後，伯明翰終於喺禮拜日嘅升班附加賽決賽，以互射十二碼氣走諾域治，第一次升上英超聯，認真可喜可賀，而我求大俠亦唔得唔服佢哋嘅領隊布魯士。
前曼聯球星布魯士喺季初帶領水晶宮有聲有色，形勢大好；點知一個屈尾十去咗教成績下滑嘅伯明翰，不過佢一樣掂，帶領伯明翰成功升班。
講開又講，隨住打比郡、葉士域治同埋李斯特城降班；而維拉又愈踢愈沉，英超嘅中部勢力真係一日弱過一日。今次伯明翰成功升班，雖然被博彩公司列為下屆降班熱門，不過如果布魯士再次發揮「神奇力量」嘅話，話唔定成功護級之餘，重攞埋維拉呢個中部一哥位㖭！
唉！真係俾人玩死！早輪有國內網上傳媒話，中國國家隊隊長范志毅自稱已穩奪亞洲足球先生，點知噚日另一間國內網上傳媒，又話電話訪問咗「范大將軍」，佢話從冇講過自己已獲獎！其實，亞洲足球先生結果會喺星期五知道，根本冇必要夾硬話係當事人講啫！
啱啱去咗杜拜集訓嘅英格蘭最近唔知行咗啲乜嘢衰運，球員傷完一個到一個，基本上一條正選中場線都係傷兵。唔單止咁，據佢哋嘅軍醫講，集訓嘅球員根本身心俱疲，去杜拜最好唔好練波，淨係享受陽光與海灘就啱喇。如果係咁集訓嘅意義咪冇晒，唔怪得英格蘭領隊艾歷臣咁𢱑頭啦！
艾芬保今夏離開拜仁，隊長懸空問題一直困擾球隊，結果門將簡尼繼做德國隊隊長後，順理成章做埋拜仁隊長，不過委任佢唔多唔少都成為德國足球衰退嘅指標。因為過去德國足球強盛時，好多時都係以中場或前鋒做阿喼，係威係勢；𠵱家以龍門去做，已經證明咗日耳曼足球真係有啲退步。
噚日舒密加全靠隊友巴里哲奴讓賽先至攞到奧地利賽站第一名，佢之後話車隊今次嘅決定係錯嘅，令到佢同巴里哲奴都唔開心，之後重發誓如果今季有機會，佢一定回報隊友咁話。鬼咩！睇嚟今年嘅總冠軍都係呢位德國車神攞硬，唔通巴里哲奴要佢幫手攞第二咩，第二名同世界冠軍差天同地喎！
鄧肯雖然攞咗常規賽MVP，但係如果要選季後賽MVP嘅話，佢就拍馬都追唔上拜恩同傑特。高比仔喺連續兩場作客馬刺時，最後關鍵時刻大發神威，一夫當關帶領湖人反敗為勝。變咗獨眼龍嘅傑特重厲害，噚日單起隻眼都可以贏波，而且重幾乎攞到三雙佳績，我求大俠預祝佢哋喺季後賽一路威落去。