金屬表面處理、玻璃鏡面設計！今年影音產品Design潮流，真係予人一種不近人情的冰冷感覺，如果你都看膩了這類公式設計，TEAC最新的SL-D80可能會給你耳目一新的感覺；將現代CD機科技，融入懷舊的收音機設計上，渾圓的機身再加上誇張的線條設計，每一部份都充斥着50年代的感性。
記者：朱崇德 攝影：黃子偉
音響界老大哥TEAC，間唔中都會推出一啲懷舊款式的音響產品，而這個定名為Nostalgia（懷舊）系列的Hi-Fi，一直走仿木製留聲機古董Feel設計，但由於機身顏色較陰沉，所以對它好惡評語都較極端，再加上香港來貨少，所以亦較少人對它有認識。
TEAC最新推出的SL-D80，可算是Nostalgia系列中擺脫陰沉設計之作；取材自最感性的50年代美國收音機設計，渾圓的機身再加上誇張的線條，一看上去好易令人聯想起占士甸及瑪麗蓮夢露等50年代影星，至於機身顏色的選材，都是以當年最流行的紅、白、黑三色，懷古風味極濃。
不要被古舊的外表所騙，其實它是一部集合了CD唱機、收音機及鬧鐘等多功能於一身的床頭MiniHi-Fi；由於唔想破壞SL-D80的懷舊收音機外形，所以CD唱盤採用了隱藏式設計，雖然在機頂正中，但合上後只會留下細細的縫隙，真係好難察覺。為提供最佳音質，CD頭使用了一級的3束式雷射頭，除拾讀能力較準確外，重兼容到一般CD-R光碟。
誇張的喇叭設計，亦是全機的焦點所在；類似汽車「鬼面罩」的坑紋式電鍍銀喇叭，再配上STEREO字樣，營造出非常強烈的懷舊感覺。雖然總輸出只有3W+3W，不過實地測試時有估不到的強勁音效表現！基本的高、中、低音表現唔錯，不過最正係機背備有Woofer設計，就算百零呎的睡房，應該都好夠炸！
接收電台節目的頻寬，網羅大部份香港的電台；不過最搞鬼係完全不設自動搜尋電台功能，每次轉台時，需要用機前的旋鈕式調諧器，慢慢人手調校正確電台頻道！唯一的輔助工具，就是機前的電台頻道刻度表，收得清唔清，就完全睇你自己手勢啦！至於響鬧功能，用家只需用機前非常Classic的4位數字LED螢幕，就可以預設任何響鬧時間，響聲可選CD音樂或收音機，玩復古玩得非常徹底！
體積：297(W)×173(H)×180(D)mm
重量：3.2kg
總輸出：3W+3W
音箱直徑：2.5吋×2
收音機頻寬：
（FM）87.50MHz-108.00MHz
（AM）530kHz-1710kHz
店舖：華仁會
電話：23980280
地址：旺角花園街75-77號花園商業大廈5樓
網址：