賓架L請幾位朋友食午飯，居然係去金鐘香格里拉酒店食自助餐，少見也。平時多數係食中菜、意大利餐或者法國餐。中午自助餐？點食得落呀，食完就下晝瞌眼瞓都似。不過賓架L話久唔久要有啲變異，先至冇咁悶，何況佢認為香格里拉自助餐收二百幾蚊啫，夠便宜喎，但星期五、六嘅晚餐自助餐就收三三八，另加一，價錢都幾和味。
香格里拉咖啡廳改裝之後，成個自助餐專門店格局，事實上，佢食物之多、之好，亦勝過晒同類酒店，唔怪得日日中午爆棚，生意非常好。呢個世界，做貴嘢，夠高檔，唔怕經濟衰退；做平嘢，配合街坊口味，亦有市場。最弊係中檔，唔高唔低，例如啲大型酒樓，真係好難捱。喺香格里拉食一個自助餐，可以喺將軍澳食十日晏晝，總之各有各做，順從市場。
幾位老友食生蠔凍蟹之餘，自然講起狗仔隊跟到巴黎影相之事。賓架L以前住過LeBristol；高級就夠晒高級嘞，不過賓架L就嫌啲夥計唔多睬啲黃面佬，服務唔算頂級。我哋笑佢嘅名氣、人氣都冇賓架李咁巴閉，點會得到最佳服務吖。正是物傷其類，大家對賓架李非常同情，亦好驚自己會俾人跟蹤影相。話口未完，左丁山出去攞嘢食之時，碰到經紀C同一位靚女坐埋一齊，於是向佢擠眉弄眼，佢急急起身介紹：「我個女，呢位係左Uncle。」原來大家都係杯弓蛇影。