上禮拜六，唔知阿松同伏明霞呢對戀人有冇情海翻波呢？記得八方同大家講過，上禮拜五有間公司在本港兩份報紙登咗全版廣告，以小伏「實物原大」嘅大頭相配上有「阿松」字樣的手機來電顯示，再加上一句手寫嘅「你有冇掛住我!!」同兩個心心，實行藉梁伏戀大賣手機廣告。
個廣告一出，即搞到滿城風雨，累小伏惹來藉阿松過橋賺錢之嫌。阿松當日回應係「毫不知情，毫無關係」，從字裏行間都隱約感到阿松嘅怒氣；而小伏當晚更立即發表聲明，話考慮對呢個廣告採取法律行動，明顯係向愛郎表明清白。
呢間公司今日終於登出半版道歉啟事，承認擅自加插一啲不在原本廣告內嘅字眼，該廣告事前亦未得到小伏同意。據八方所知，今次至少有三份報紙會刊出呢份道歉啟事，當中包括在《蘋果》C10版。
其實，今次呢個廣告，係伏明霞一早為內地一間手機製造商拍攝。呢排梁伏戀成為全城熱話，唔知邊個諗條咁嘅橋，結果部手機嘅港、澳、台代理經銷商就出咗個「加料」廣告。但說到底，如果阿松同小伏唔再追究，間公司無端端上咗幾日新聞版，登多幾個全版廣告都抵番。
不過，八方打探到，小伏好快就唔使藉廣告訴心聲嘞，因為阿松呢個月底可能就會上京開會，傾吓搞自由貿易區嘅嘢，其間重會去山東一日咁多，唔知到時阿松同佢會唔會把臂同遊孔夫子家鄉呢？
E-mail：