恒指服務公司季度檢討，新一季恒指成份股冇變，即係話港交所（388）暫時唔會成為新貴，連跌3日。
港交所係重磅股，Size重大過信置（083），遲早成為恒指新貴，望3個月後再檢討時有機會上榜。就算唔係恒指股，日日幾千萬銀成交，唔係基金買賣係邊個買賣？
港交所前禮拜五見15元高位，昨日最低13.75元，彈番上13.95元收市，跌10仙。由最高位計，6日唔見1.05元，跌得差唔多，係時候趁低揀隻Call輪搵食。
港交所Call輪9039，昨跌2仙，收31.5仙，跌突咗啲。由6日前高位41.5仙計起，已經跌足10仙，啱價買。8月到期，溢價1.4%，槓桿率4.4倍。講數據同成交量，其他同類Call輪冇1隻及得上呢件。
4大地產股都有進帳，新世界（017）郁得最少，收6.75元，升得1格，有機會做番好啲。
可以諗吓新世界Call輪9172，昨收16仙，升得0.1仙。10月夠鐘，溢價3.7%，槓桿率4.2倍。其他同類輪槓桿率普遍大啲，但溢價過高制唔過。
章 盛