港大噚日正式確認徐立之做校長，搵到位國際級學者領導大學，相信港大校務委員會主席馮國經都應該鬆一口氣。不過，馮博士曾經話過希望新校長能夠「帶領港大成為全球首二十五間世界級學府之一」，就有啲考起八方，因為八方搵過啲資料，都搵唔到有一個全球大學排名榜，唔知呢「二十五大」點嚟？
網上《泰晤士報》教育編輯喺過去都收過唔少讀者查詢，只可回覆話𠵱家冇一個全球嘅大學排名榜；而已經執笠嘅《亞洲新聞》喺二千年做過一個亞洲嘅「綜合課程學院排名」，港大排第三、中大同科大分別排第六同第七，但國內著名學府北大、清華都榜上無名，幾𢱑頭。難怪徐立之噚日被記者問到點帶領港大躋身全球二十五大時，佢都反問記者有邊間大學係二十五名之內。
E-mail：