高盛與大摩企於同一陣線，高盛亦調高滙豐（005）投資評級，港股噚日升87點，重上11700水平之上，不過成交有萎縮現象，若冇新錢入市，港股唔單止企唔穩11700之上，甚至有機會跌穿11500。
有口痕友話，長實（001）分拆長江生命科技上市，刺激生化科技股上升，與長科名稱相似嘅生命科技（1180）更大升19.23％，收0.31元，成交5681萬元。
黑客話，有傳聞生科只係借勢推高股價，準備另一次集資行動，呢間公司去年底曾先舊後新配售2億股，每股作價0.235元，集資4700萬元，但其實當時係想抽水成億元，用作投資內地藥廠，只不過當時市場環境唔好，所以集資規模大減。
友利電訊（419）噚日再大升13.6％，收報0.10元。此股由3月初0.05元水平升至今時，累積升幅達1倍。Cookie話，友利主要係追番天地數碼（500）嘅市值，友利持有40.05％天地數碼，市值3.046億元，相當於每股友利持有0.11元天地數碼之市值，只要友利升多10％，就可以追貼所持天地數碼嘅市值，亦即係話友利可能再無炒作藉口。
國中控股（202）噚日復牌，勁升12.7%，收1.24元，成交高達3.18億元，隨時會係光通信（603）翻版。
阿 虎