𠵱家後生仔女總係鍾意睇埋啲愛情劇，日劇熱潮一過，又話興韓劇，佢哋話《藍色生死戀II》嘅男女主角愛得至死不渝喎！本來就快三張嘅我一早已經愛得至死不渝，不過上星期去完南韓江原道嘅南怡島拍攝場地後，見到情侶成雙成對，喺樹影婆娑下漫步，雖然劇中嘅雪景已披上春裝，但嗰種浪漫氣氛確係正斗，如果唔係我專一，真係恨不得是但拖個韓女即刻拍個散拖頂住癮！
記者、攝影：朱維達
鳴謝：韓國觀光公社、亞洲電視
《藍》並不只是在南怡島取景，束草、東海、龍平、春川亦是拍攝場地，亦同是位處漢城圈東北的江原道內，不過相信你好似我咁去勻咁多個拍攝場地之後，都會同意其中嘅南怡島最令人動情！南怡島可謂是一個樹島，全島皆樹之外，重有六個香港維多利亞公園大嘅大草原，島外人最愛攞着一箱二箱食物嚟草原野餐，搭完約十分鐘嘅觀光船之後，就開始呢個一人浪漫之旅。
落船之後唔好跟住人群向右行，睇到下年先開幕嘅SongIsland遊樂場後往左轉不遠處，就可以見到多個拍攝場地，縱使呢度已由劇中雪景變成𠵱家嘅綠蔭處處，但係拖住手仔同你個「Baby」經過多條棗樹路，幾浪漫喲！
島上有一家名叫「戀家」店，係劇中演員化妝、休息嘅地方，現已改為Cafe同小飾物店，亦可在此買到劇中女主角嘅五星鏈（14K金鏈99,000圜，約602港元）；愛刺激嘅，可以花30,000圜（約182港元）租架快艇遊湖（最多可坐5人），島主更為大家安排2-20人不同類型嘅單層屋，畀大家築一個臨時愛巢。據島主講，遲啲重會起個接吻屋，大家手拖手入去錫完一輪出番嚟，重有張證書印證此段美好回憶，認真搞嘢！
南怡島
地址：春川市南山面芳荷里
交通：從加平長途汽車站往南怡島停車場坐接駁船，約15分鐘。
查詢：（82）31-5822181（京春旅遊開發）
接駁船期：每日7:00a.m-10:00p.m
船費連入場費：成人5,000圜（約30港元）、小童3,000圜（約18港元）
距離世界盃只剩下十數日，酒店房間已接近爆滿，若你仍然頭痛於住宿問題，不如入寺投宿幾天，將呢幾日嘅熱情暫時冷卻，同另一半一齊清心寡慾一番。
距離龍平以北約20分鐘車程、位於五臺山嘅月精寺，平日除了虔誠的佛僧，現在你亦可以投宿於此！該寺將於5月20日建成供遊客入住的宿舍（TempleStay），直至6月30日你都可以透過網上或Walkin訂房，一般4-5人一間房連洗手間、浴室，每位收30,000圜（約182港元），當然，你要同時嚴守寺院規矩，用膳時亦只會提供齋菜。
月精寺
地址：江原道平昌郡珍富面東山里
電話：（82）33-3326661/5
交通：可先在江陵長途汽車總站坐公共汽車，到珍富面下珍富裏下車（車程約50分鐘），再轉換開往月精寺的市內公共汽車，在月精寺下車（車程約20分鐘，1日共10班車）。
訂房網址：
網址：
可能你都會去過著名嘅滑雪場龍平，𠵱家去只會睇到一片又一片嘅草原，玩高爾夫球亦係唯一重點娛樂，不過我成日都覺得，同你另一半喺埋一齊，去邊度都咁開心，再講，今次嘅拍攝場地除了喺地面，亦曾於海拔1,458米嘅山頂餐廳取景！
雖然山腳有成十幾度，但係坐住部吊車上山就愈嚟愈凍，去到山頂時已經得番幾度，當時又遇到大風（十足劇情中女主角鄭惟珍因大風雪未能於當晚落山一樣），可以話係「風煙四起」，呢個時候，除咗叫杯熱朱古力，攬住隔籬嗰個都相信無咩可以做，又難怪劇中男女主角情到濃時……
龍平滑雪場
地址：232-950江原道平昌郡道岩面龍山里130
電話：（82）33-3355757
傳真：（82）33-3350160
網址：
房租：StandardRoom雙人房租170,000圜（約1,034港元）
交通：漢城市有免費定期巴士往龍平。
電話：（82）2-5641311
出門提一提
簽證：無論持BNO、特區護照或CI者均毋須簽證。查詢：25283666（大韓民國領事館）
機票：乘泰國航空來回漢城，單人票價錢$1,970（17日有效期）。查詢：23900421（學聯旅遊）