噚日係母親節，唔少一家大細飲完茶，都會選擇去逛商場，又或者睇新盤示範單位，而新開張嘅維景灣畔三期示範單位，大型宣傳未正式上馬，過去兩日已經人頭湧湧，發展商當然唔放過咁好嘅時機，以兔仔鎖匙扣贈予各位母親作招徠，太古馬淑貞同蘭西講，批兔仔係限額版，每盒兩隻嘅原因，係個盤由兩個發展商合作之故。
代理方面亦好識把握時機，利嘉閣就花費咗2萬5千蚊，買來兩千支康乃馨，派畀參觀名逸居同維景灣畔三期嘅母親大人。
至於新上任嘅恒隆吳士元，噚日仍然喺名逸居售樓處駐守，佢話媽媽身在外國，故只可以同外母，現任東區區議會主席嘅丁毓珠共進早餐。
另外，長實近排推盤計劃一籮籮，吸納旗下新盤附近地舖作根據地，好似上環普頓臺，長實剛剛喺對面街租咗個舖做售樓處，而大角嘴凱帆軒亦會用相同做法咁話。
蘭西