呢排上海幫唔知係咪搵到大水喉，股仔逐隻輪流炒，重要炒親都係升到你唔信，單日冇幾十個巴仙升幅都唔肯收手。
好似國中（202）上周四急升停牌後，又輪到同一個老闆，啱啱由華利資源改名做國新（1215）接力炒上，上周五急升21.2％，收4仙，成交金額1.23億元，唔似係冇料到乾炒。
經紀陳舊事重提，問小初記唔記得3月中時，佢曾經提過華利資源會大變身，改名之餘重會注入由國中持有嘅證券業務，成為金融控股旗艦。
佢講起又好似有件咁嘅事，不過小初記得，自從嗰陣開始，華利資源大股東就不斷減持，股價係咁下跌，由5仙插到落3仙，所以小初就當經紀陳亂講，冇再留意。
經紀陳話，大股東大幅減持，如果唔係有人接貨，股價又點守得住３仙？所以成件事係一早有部署，大股東不斷減持，安排轉倉而已。
慕容小初