唔知點解一到季後賽湖人就興鬧內訌，今次嘅主角係奧尼爾同積遜教練。
據我求大俠所知，「巨無霸」喺對馬刺嘅第二戰時整傷咗手指，縫咗成七針，加上佢嘅腳趾公舊患復發，搞到佢成場波都要忍痛頂硬上；點知積遜唔單止唔體諒佢，喺賽後重捉咗佢去訓話，指佢比賽唔夠落力，結果兩人鬧到面紅耳赤，不歡而散。
原本單嘢都無乜人知，點知積遜喺班記者面前爆晒響口，俾人乘機攞嚟大做文章，激到奧尼爾係前日俾記者問到有關佢嘅傷患時爆晒粗：「你自己去問積遜囉！佢乜X嘢都知啦！」一怒之下更決定杯葛傳媒。
積遜噚日終於出嚟解話，佢輕描淡寫話對奧尼爾只不過係「愛之深、責之切」，重鬧班記者加鹽加醋，搞到單嘢愈鬧愈大。計我求大俠話，綽號「禪師」嘅積遜出名老謀深算，最叻係打心理戰，今次其實又利用傳媒施展佢最擅長嘅激將法，班行家同奧尼爾都俾佢呃晒囉！
捧盃原本係好開心嘅事，但阿仙奴嘅稻本潤一同史彭洛夫斯，喺前晚超聯冠軍頒獎禮上，就表現得有啲強顏歡笑。事關佢哋兩個喺今屆超聯踢唔夠十場（稻本更係一場都未踢過），所以冇資格攞獎牌。不過，喺前晚場波後備入替嘅泰萊，就啱啱湊夠數，但佢有牌攞就笑囉，之但係因為佢完場前失球，買阿仙奴上盤，喊得一句句！
資訊科技太過發達，唔知係咪好事。好似前晚嘅西甲聯咁，拉斯彭馬斯同特內里費球員唔知係咪知道馬略卡反勝華拉度列嘅消息後，令前兩隊都護級無望，竟然一齊散晒；另外當巴塞隆拿打和薩拉戈薩攞到歐冠盃資格後，原本有份爭嘅切爾達都喺完場前輸埋，有冇咁蹺呀！
禮拜六巴塞作客薩拉戈薩係歷斯治最後一次領軍，估唔到佢最後重要玩下三件荷蘭兵。奧華馬斯熱咗身成個鐘都無份落場、古華特踢得好好地被換走，離場時一臉怨氣，列斯加被迫踢左閘醜態百出。淨係睇呢場波一定覺得歷斯治同荷蘭兵有心病。
將會喺禮拜三同皇馬爭歐冠盃冠軍嘅利華古遜，喺前晚場德國盃雖然夫添對史浩克04，但踢得唔係太落力，結果輸二比四，繼聯賽後再次做阿二。鬼咩，皇馬喺大前日對拉科場西甲聯玩留力，利華古遜見到佢哋咁做，梗係要有樣學樣。佢哋兩隊咁用心良苦，希望後晚可以打場好波畀球迷睇嘞！