上圍原本只有31A嘅吳君如，近日俾陳妙瑛邀做豐胸代言人，日前佢去咗一間內衣店狂掃胸圍，而且選購嘅戰利品全部係33B尺碼，莫非試食咗兩個月豐胸藥之後成功升Cup，所以急急換bra？
當日君如專攻胸圍款式，而老闆陳妙瑛緊張君如多過自己，搜尋到靚款式時，就即刻攞畀君如試戴，又不時聽到佢教君如買胸圍嘅秘訣，又話胸圍要戴得夠貼，個杯位要點樣承托胸部先合適。
君如攞住一堆心水靚bra準備試身前，售貨員問佢要乜嘢尺碼，君如就毫不猶豫話：「33。」起初售貨員畀咗啲33A嘅bra君如試，但佢試咗一個之後，就同陳妙瑛講話唔啱身，要求換個33B再試。
試着33B嘅君如走出嚟時，開心到好似執到寶咁，笑到四萬咁口，連陳妙瑛都笑住同君如講：「掂啦！」
佢哋兩個係間內衣舖搞咗成個鐘頭，君如一共試咗十幾個胸圍，偏愛有承托力款式嘅佢，最後買咗四個33B胸圍，埋單千幾蚊。而陳妙瑛就買咗兩個34吋嘅戰利品。
大前日MaggieQ先至應鄧永鏘邀請，去佢間雪茄店嘅開幕活動，估唔到佢哋兩個人直落重有節目。前晚鄧永鏘首先單拖出現君悅，過咗冇幾耐就見MaggieQ嚟嘞，本來大家都去君悅玩好平常，但奇就奇在MaggieQ走嗰陣，竟然係同陳冠希家姐Olivia上咗鄧永鏘架座駕，不過當時車上面就冇鄧永鏘本人，唔通係純粹借架車畀靚女用咁簡單？
鄭秀文近排無端端俾人話佢同個女助手嘅家姐同居，重講到佢兩個人嘅關係鬼死咁曖昧。但據馮仁昭所知，呢件事其實係發生喺早幾個月之前嘅，當時Sammi同許志安嘅冷戰重未結束，佢因為心煩到死，又唔想俾安仔搵到佢，結果佢就走咗去女助手阿爽嘅家姐屋企住咗一輪，因為佢同阿爽家姐幾好傾，又諗唔到會俾人咁寫法。
朱茵近日拍咗個纖體廣告，不停着性感衫出現，唔少人都大讚朱茵好索。馮仁昭近排聽講坊間有「中間人」對朱茵好有興趣，希望為佢安排飯局，所以四出搜括朱茵嘅聯絡電話。唔知朱茵嘅男朋友黃貫中聽到呢個消息之後，會唔會下令唔准女友再行性感呢？
謝賢噚日下晝四點幾獨自駕駛佢架寶馬去兒子謝霆鋒居住嘅裕景花園，當謝賢上樓探霆鋒時，佢竟手持一張類似麻雀紙嘅嘢，唔通霆鋒真係留喺屋企悶到發慌，所以佢急call謝賢去開枱？不過咁除咗謝賢、霆鋒兩父子外，重有邊兩隻腳會落場呢？
楊思琦舊年贏咗港姐冠軍後，得到一部價值十八萬嘅本田Stream七人RV房車，因為當時佢冇車牌，所以就話會送畀佢爹哋。但係冇幾耐之前，楊思琦已將部車賣咗，佢同馮仁昭講話佢爹哋自己嗰部車重用得，屋企人唔想浪費，所以先至賣咗架新車，但佢部車賣咗幾多錢就唔講。