廚藝精湛到連已故領導人鄧小平都讚不絕口，綽號「鮑魚大王」的香港廚神楊貫一，昨日啟程遠赴法國，出戰首度在巴黎舉行的「國際廚藝大師表演賽」。來自全球六個國家的頂級廚神，將與阿一比試廚藝，爭奪全球廚藝大師的最高榮譽。
阿一啟程前好輕鬆，佢話：「能夠代表香港，踏足世界廚藝大師舞台，已經覺得好開心，好光榮。」至於如何備戰，阿一話向來鍾意親自下廚煮番幾味，今次專登準備了約二十隻六頭網鮑炮製「皇帝鮑魚」，和其餘六位廚神較量。
阿一能夠代表香港出賽，全因在去年底，旅遊發展局主席周梁淑怡、蘭桂坊之父盛智文、法國美食會香港代表古載禮、香港飲食業東主協會主席麥耀堂、和發起今次大賽的世界知名瓷器商華登峰．瑋緻活的遠東區代表戴維斯，一行五人突擊到阿一的飯店，點了數款菜式，包括「蟹黃三色包翅」、「生煎鹹雞髀」、「乾煎金蠔」、「冬筍豆苗」和「阿一炒飯」，之後再點「煎烹海紅斑」和「芝麻糊官燕」。阿一話當晚都唔知係港區選拔賽，只知有大客光臨，自己要親自下廚不敢怠慢，埋單找數七千元。
法國美食會香港代表古載禮話，來自英國、美國、法國、意大利、澳洲、日本及香港的廚藝大師，都是經過各區五名評審委員的連串突擊試食選出。英女皇前媳婦莎拉本周四將會出席今次在巴黎舉行的廚藝盛事，阿一能否為港爭光，贏取國際廚藝大師最高榮譽，大家拭目以待。
（圖）阿一拿手整鮑魚，今趟準備了多隻六頭網鮑遠赴巴黎，迎戰六國廚神。
E-mail：