早前，亞Mark話過遲吓香港車市，又會好熱鬧喇！皆因有唔少新車，其中又以歐洲新車款，會響年中過後陸續抵港推售㗎！然而，近期看似無多大動靜嘅英國積架，原來早前代理秘密運嚟一批新版S-Type2.5V6型號，用以試探市場反應咁話；由於車價吸引加上數量有限，重好快沽清㖭！之不過據亞Mark所知，代理並非着重呢款S-Type新車，反而着眼點會係用上一台2.0公升偈嘅X-Type新版豪華轎車，用以抗衡平治C-Class同寶馬3系嘛！
以積架多年來嘅貴族化氣息，加上一分獨特嘅英國轎車風味，若然車價定位於32萬上落的話，相信會有唔少車迷追捧㗎！據知新車會響嚟緊6月上旬抵埗，忠實嘅積架車迷就要拭目以待喇！