呢排香港個股市變化莫測，八方都唔識睇，原來台灣股市重難預測。
話說美資大行高盛集團總裁兼聯席營運長沈約翰（John.A.Thain）訪問台灣，總統陳水扁親自接見，沈約翰話高盛將會為台灣公司集資五十億美元（約三百九十億港元），但係繙譯搞錯咗，話高盛會投資五十億美元於台灣股市，英文麻麻地嘅阿扁同總統府其他大員竟懵然不覺。
本來事件未算大鑊，弊在總統府辦公室發表聲明，將「喜訊」傳開去，高盛輾轉聽到，嚇到面青之餘，即刻要求總統府澄清，唔知係咪夜得滯，結果五家有呢段新聞嘅傳媒中，只有《中央社》及《工商時報》改得切，《聯合報》、台灣《經濟日報》同埋《台灣日報》都話高盛會引入五十億美元投資台股。
台股呢排本來跌到一仆一碌，加權指數九個交易日累計跌咗百分之十一點五，嗰兩日就反彈，升咗百分之一點七。香港地如果有人發布假消息造市，香港證監會有權檢控，唔知台灣有無類似規定。
睇嚟阿扁都係要搵番英文嘞嘞聲嘅蕭美琴返嚟助陣。
E-mail：