電影《蜘蛛俠》上映後，在美國掀起一片「蜘蛛熱」，學玩攀登運動的年輕人為此增加不少。別以為蜘蛛俠只會在美國出現，香港亦有一個被人冠以「神奇小子」稱號的港版「蜘蛛俠」黎志偉，在攀登界出道半年已取得亞洲青少年錦標賽冠軍，為港爭取此項比賽的第一面獎牌。最近，他還獲頒傑出學生榮譽，這位見牆都想爬的小子堪稱文武雙全的蜘蛛俠。 記者：曾順珍
攝影：楊錦文
到黎志偉就讀的屯門譚李麗芬中學做訪問，校舍雖然不大，但環境總算清幽，操場上只見他跟同學們正在嘻嘻哈哈的打籃球，大概年輕人都總愛那種滿身是汗的感覺。
提起電影《蜘蛛俠》，黎志偉即面露興奮的神情：「我最鍾意他喺鬧市中穿梭那一段，感覺好正。我唔覺得自己似蜘蛛俠喎，但佢攀爬嘅動作我就好有同感。不過，人唔會噴絲，所以我諗過用安全帶代替，兩邊縛條繩，好似泰山咁盪來盪去。」
問這位剛獲得傑出學生的黎志偉何時開始玩攀登運動，他會很自豪的說自己玩了只有兩年時間，但卻贏得多項國際賽的獎牌。尤其是2000年在北京的亞洲少年錦標賽，他發夢也想不到玩了半年，居然可以贏個冠軍回來。
「我自己都覺得係個奇迹，因為本來我只係想吸收吓經驗，個個都諗住我會輸，但點知就畀我贏咗，我竟然可以用12秒就爬咗上去（13米）；之後我喺2000AsiaXGames度用咗7秒爬咗12米，佢哋覺得好驚訝，後來台灣嘅選手重叫我做『神奇小子』㖭。」
聽黎志偉講當時的比賽情形，就知道這個小子真是天不怕，地不怕。原來在亞洲賽來說，攀登運動一向都是日本和韓國選手的天下，那年跟他一起入四強的，全都是練習了三、四年的韓國選手。「我重記得嗰三個韓國選手一面講韓文，一面望住我笑，但我心諗：『我唔驚你哋，等一陣間你就知！』當我知道自己贏咗冠軍之後，我居然喺場中狂叫，含住淚水同教練擁抱，原來喺奧運裏面見到嘅場面，真係會發生㗎喎。」
黎志偉是在前年才開始接觸「攀登」，他解釋可能本身都有游水、玩跆拳、網球、乒乓波等，心肺機能不錯，加上前輩的教導，才會進步神速，屢獲香港及國際性獎項。對二十歲不足的小伙子來說，是有點少年得志，但卻接受不了失敗滋味。
「記得嗰次去俄羅斯比賽，因準備唔夠，我失準得好厲害，連Final都入唔到，我好失望連鬥志都無埋，返港後我想暫停練習，好在教練打電話嚟鼓勵我，我才可重新振作。」現時在黎志偉的腦海入面，只會想着攀登的事情，無論屋邨的牆壁，甚至北京的長城。
回想起當日參加攀登運動，黎志偉話只因學校築了一幅攀登牆。「前年暑假，學校啱啱築咗一幅攀登牆，我咪走去試吓玩，冇耐阿Sir又叫我去試吓參加比賽，認識咗青訓隊教練陳玉蘭，於是我就跟佢學攀登，半年後佢叫我去北京參加錦標賽，有機會去公開比賽喎，梗係畀心機練啦。」就是這樣發掘了他爬牆的天分。
「初時父母都唔係咁鍾意我玩，覺得會影響學業，但當我攞咗獎返嚟，佢哋就變得好支持，有次我去外國比賽，阿爸前一晚重幫我執埋行李！可能獎項肯定我喺呢方面有發展，唔係玩玩吓，所以練完返嚟湯水都煲多咗畀我，我又比以前珍惜同佢哋相處時間。」
作為一個經常見報的學生，在校內總會惹來羨慕或妒忌的眼光。「妒忌？我又唔覺喎，可能我人緣好啩，同學至多話好羨慕我可以周圍飛，但其實好辛苦㗎，因為返嚟之後我好驚啲成績追唔上，惟有靠老師幫我補習……我試過有次喺籃球場度行，有個低年班嘅師妹用相機影我，之後就立即俾Miss拉咗去傾偈，話唔可以喺學校搞啲咁嘅嘢，但係我只不過行過之嘛，不過男仔女仔都會搵我簽名㗎。」黎志偉掩不住內心喜悅的神情。
愈聽黎志偉講話，愈發覺他比同年的朋輩思想成熟，對答如流，禁不住問他做過多少次訪問。「二十多次左右，所有報紙雜誌同電台都有。我都好多謝你哋，如果唔係成日做訪問，訓練有素，今次喺傑出學生面試時對住評判都唔知講乜」
黎志偉坦言玩了攀登後，整個人思想也成熟了，從前一味只懂玩，現在會想想以後的路向和計劃。就連讀書成績亦有進步，由以前的中等，變為全級第九名。「我𠵱家嘅志願係當警察，但係目標未達到之前，我會全心全意做運動員。我啱啱讀完一個教練課程，諗住遲啲可以聯絡所有學校嘅同學，一齊玩攀登運動。」做年輕人的好處便是有停不了的夢想。
出生：1982年澳門
來港：1991年
學校：中華基督教會譚李麗芬紀念中學
1999年
‧第一次接觸攀登運動
2000年
‧第十三屆香港攀登公開賽新秀組難度賽第二名
‧第二屆亞洲青少年錦標賽（北京）青年組速度賽第一名
‧第九屆亞洲錦標賽（吉隆坡）男子組速度賽第二名
‧第三屆香港運動攀登錦標賽新秀組難度賽第一名
‧泰國2000AsiaXGames男子組速度賽第五名
2001年
‧康體發展局運動員資助基金入選運動員
‧康體發展局全港體壇新星入選運動員
‧第十四屆香港攀登公開賽速度接力冠軍
‧第三屆亞洲青年攀登錦標賽（伊朗）速度賽冠軍
‧世界盃2001（馬來西亞）速度賽第十八名
2002年
‧香港運動攀登錦標賽2001/02公開組第二名