近年拓展歐洲市場有唔錯表現嘅日本豐田車廠，計劃推出多款新車，以穩企前列位置。繼早前廠方透露會響明年下旬替凌志GS300（即日版Aristo），推出全新用上4.3公升V8偈嘅GS430新車後，喺嚟緊嘅2004年，豐田廠方又會替MR2（即日版MR-S），推出全新強化包裝嘅MR2V6超級Roadster；除造型予人一新耳目，又見有霸氣之感外，佢最備受矚目嘅地方，將會係換裝上一台3.0公升V6（馬力達250匹）新偈。
此外，新車重會有一個全新開發嘅底盤結構，用以抵銷新偈所帶來大馬力及扭力嘅衝擊嘛！再者，裝置有一台橫列3.0公升V6偈嘅引擎室前方，重置有粗壯嘅金屬防滾架㖭！有興趣嘅車迷，就要密切留意新車嘅推出日期喇。