美股杜指上周三勁升305點後，連續兩日下挫，上周五再跌98點，已回吐上周三升幅2/3。至於港股本周係咪繼續我行我素，唔受美股升跌影響，仍有待觀察。
雖然港股上周四升至今年高位11962，出現單日轉向，以「穿頭破腳」嘅大陰燭回落，展開技術調整，但恒指短期如守穩11600水平，後市仍可看高一線。
港股今日走勢會提供相當大參考作用，如果恒指今日只係補回部份上升裂口（11577至11497）就反彈，趙飛雲會先吸納1注恒指Call輪9045，買入後若跌穿250日線11462則計數止蝕。
相反，如果今日恒指完全補回裂口，收市跌穿11500水平，則恒指向下考驗250日線及20日線11377的機會大增。雖然跌至呢個區域會有支持，但形勢轉淡，就算博反彈亦要見好即收。
基本上，如果恒指調整只限於11600附近，則稍後快速升破萬二關的機會較高；如果恒指跌穿11400頸線，則反映這次升浪頗大機會完結，要重新檢討整個形勢。正如上周六講過，恒指本周橫行整固的機會較大，藍籌輪及恒指輪吸引力會下降，但長實（001）分拆生物科技業務好事近，會借機炒上，長實Call輪有留意價值。
趙飛雲