盧女士任職地盤工人的丈夫兩年前突然中風猝死，遺下六歲女兒阿兒及五歲輕度智障兒子安仔，安仔患哮喘病，需經常看醫生。孤寡三口租住狹小單位，依靠綜援金度日。近日，他們獲分配公屋單位，惟盧女士無力支付租金及雜費按金等搬遷費用，蘋果基金即時撥款五千元，以解燃眉之急。
「目前暫時用住啲生活費嚟交租，呢個月剩番七百幾蚊，其他煤氣、水表嘅按金都未交，新屋連煮食爐同埋基本嘅電器都冇，𠵱家用緊嘅家具都係人哋畀嘅。」三十三歲的盧女士憂心忡忡歎道。
從事製衣工作的盧女士，婚後沒有工作，丈夫乃家庭經濟支柱，任職鐘表行業十多年，受生意不景影響，遭公司裁員，失業一段時間後轉行任職地盤工人，每月收入僅足餬口。夫婦育有兩名兒女，患有輕度智障的安仔，需佩戴助聽器，年多前更罹患哮喘病，身體較弱，容易發燒。
「可以搬去新屋梗係開心，起碼兩個細路仔都有自己嘅家，活動範圍大啲，希望對佢哋嘅健康都會好，不過最擔心係搬到入去乜嘢都冇。」盧女士一臉無奈地說。
盧女士每月除了繳付家庭的基本伙食費用之外，還要應付兒女每月千多元的書簿雜費開支，經濟緊絀。
同時，她亦要定期帶同安仔往返醫院覆診及領取藥物，在交通費上的開支約需數百元。
「𠵱家每個月慳慳哋都夠使，平時我哋都係去公園玩或者去圖書館睇書，不過，安仔身體唔好，會盡量㷛多啲湯水，畀多啲營養佢。」盧女士坦言。
由於安仔不能清楚用言語表達意思，現時需要接受語言治療，助其發音。獲知快將遷入新居，在幼兒中心就讀高班的安仔羞澀地說：「好開心﹗」
蘋果日報慈善基金了解盧女士的生活困境，即時撥款五千元，協助她繳付搬遷費用，減輕其經濟負擔。
捐款編號：C0349
暖流熱線
電話：29908688
傳真：23702192
電郵：
網址：