家陣經濟唔好，唔少人都想慳得就慳，所以近年各大電器舖都增加國產電器嘅款式，希望以低價贏取客人歡心。好似近期天氣熱，唔少國產冷氣機都大賣特賣。其中Shinco更繼主攻DVD機市場之後，首次在港推出冷氣機，並以$1,888平通街價推出分體冷氣機，堪稱全港最平，重有其他各款祖國製造嘅影音產品，一樣夠晒平兼功能齊備，絕對買得過。
記者：張穎倫
攝影：陳智良
ImageGirl：Kay
以$1,888呢個價錢，只可以買到1匹窗口式冷氣機，而1匹嘅國產分體式冷氣機，就算係開倉價抑或係大減價，都必定要$3,000左右。所以呢部淨冷分體機嘅售價，絕對係一個創舉。講到質素佢亦唔差，自動送風、靜音轉動設計等全部有齊，而且機身亦夠纖巧，再加上原廠三年壓縮機保用，夠晒抵玩。
型號： 新科KF-25GWMA（行貨）
匹數： 1匹
尺寸： W820×H265×D188mm
售價： $1,888（華仁會）
安裝費用： $880
呢部2匹機唔單止售價平，重有齊高效防塵過濾網、無線遙控等功能。更厲害係大部份分體機都要收取$2,200嘅安裝費，呢部機竟然只收$1,500就掂，絕對夠平。
型號： 新科KF-50GW（行貨）
匹數： 2匹
尺寸： W1000×H330×D190mm
售價： $2,998（華仁會）
安裝費用： $1,500
如果你係自己獨佔一個私人小房間的話，最細嘅1匹分體機都可能會凍親你，呢部t匹窗口機就啱啱好。雖然冇乜特別功能，但製冷能力亦唔差，易拆式隔塵網，方便用家清洗，增加空氣質素，重包埋送貨同鋁架安裝，啱晒唔需要多功能嘅朋友。
型號：樂華RAW75BCM（行貨）
尺寸：W450×H346×D548mm
售價：$1,480（影音點）
一般手提DVD機，唔理國產牌子定係日本牌子，螢光幕只有約5.8吋，但呢部新機就採用6.8吋LCD大螢幕，再配合16:9嘅畫面比例，同3-4小時嘅電池使用時間，做流動私人影院就最啱。另外，呢部機亦可以播齊PictureCD、DVD、MP3、VCD等多種格式光碟，兼容性極大。
型號：新科DVP-300（行貨）
售價：約$2,988（影音點）
發售日期： 約6月
唔少朋友都覺得，國產DVD影院只以平取勝，為咗消除大家嘅錯覺，呢套新DVD影院力谷多功能設計。除咗一次過播勻DVD、SuperVCD、VCD、MP3、CD、CD-R/RW同PictureCD，又有埋收音機同模擬5.1輸出，絕對應有盡有。更厲害係有埋雙咪嘅卡拉OK功能，唔少日本牌子都冇呢個Function。
型號：新科DVD-A833（行貨）
售價：約$1,888（影音點）
發售日期： 約6月中
近排日本牌子嘅電視機，好興加條藍色外框吸引用家，打破以往電視機嘅呆板外形而大獲好評。呢部國產29吋平面電視機亦唔執輸，唔單止外形討好，連顯像管都採用大廠東芝嘅出品，質素絕對拍住$6,000嘅日本牌子。功能上國際線路、Hi-Fi麗音、S端子應有盡有，又加送DVD機一部，絕對有資格為祖國爭光。
型號：TCLAT2990I（行貨）
售價：$3,880（華仁會）
呢部國產機已突破$1,200嘅價位，比唔少14吋電視機重平。而且亦唔係乜都睇唔到嘅單聲道PAL線機，有齊Nicam同國際線路，再加埋機前波浪形按鈕，夠晒有風格。
型號：創維CTV-21NKN（行貨）
售價：$1,190（華仁會）
大部份國產DVD機都對應唔到𠵱家流行嘅HDCD，所以聽歌時喺音質上都唔可以盡善盡美，但對應嘅日本機就最平都要$2,000以上，唔係人人負擔得起。呢部國產DVD機，唔單止採用日立嘅雷射頭，而且更對應HDCD，音質更好，其他SVCD、MP3、CDRW等當然難唔倒佢，又有埋5.1模擬輸出同卡拉OK，點玩都得。
型號：步步高931（行貨）
售價：$1,580（永明）
繼CD之後，CD-R/RW同MP3都大行其道，而且唔少人都流行將VCD演唱會當CD聽，所以乜都播齊嘅手提VCD機愈嚟愈多人搵。但日本牌子唔興出呢類機，令呢部國產機可以殺出血路，除咗兼容性高外，亦有40秒ESP防震、無線遙控同重低音調校。雖然音質唔算靚，但2粒AA電就可以帶出街玩，確係無話可說。
型號：ATECSV626P（行貨）
售價：$598（影音點）
售賣點：
華仁會（23980280）
旺角花園街75-77號花園商業大廈5、6樓
永明影音（23997991）
旺角洗衣街77號地下
銅鑼灣影音點（28380829）
銅鑼灣駱克道492號順禧銅鑼灣中心三樓301室