本欄五月三號講DavidNorton嚟香港主持BalancedScorecard講座，收費幾貴吓。《蘋果》轉來一封電郵，一位Joanna小姐話佢波士睇完之後，好有興趣，想左丁山告知報名參加講座嘅詳情。本來唔想替人賣廣告，不過《蘋果》一向視讀者為大老闆，又係大顧客，基於「顧客永遠是對的，老闆更加大晒」嘅商場「護職」格言，左丁山於是搵番啲資料，簡覆如下：
（一）主辦機構：
AdvancedTechnology.comLtd.
（二）收費：10912元（兩天研討會，包午餐、下午茶、參加者名單）
（三）查詢電話：2994-1108
傳真：2719-5009
上面講嘅「護職」格言，乃係左丁山自己作出嚟嘅。今時今日，保護、維護、守護自己份工（職位）當然係打工仔最高目標，有冇得升職加薪，可以慢慢講，護職不成，冇咗份工，重講乜升職加薪吖。顧客永遠是對的，大家已經耳熟能詳；但「老闆」之不同，各如其面焉，一啲完全聽晒顧客意見，一啲會認為顧客嘅意見多多，唔能夠全部理會。究竟幾時睬，幾時唔睬啲顧客，要睇老闆意思。掛住慳成本，唔理顧客嘅企業，大多數會執笠收場；但一日未執笠，你一日跟住老闆，仍然要睇老闆意向。所以話「顧客永遠是對的，老闆更加大晒。」能心領神會，靈活運用嘅話，護職有厚望焉。