成班老友、校友喺星期三中午坐埋一齊飲茶，紛紛討論曹仁超「投資者日記」嗰篇《沽恒生買滙控》。老曹係最有影響力嘅作家，佢寫一句都會令阿松哥暈陀陀，何況啲小人物乎，當然成個中環都日日留意佢寫邊個，彈邊個，推薦甚麼投資。
啲老友個個同意老曹話恒生過去做得「太好」，甚難突破上限。事實上，恒生銀行過往幾年在現有領導班子帶領下，在業績、股價、營運效率、呆帳撥備各方面綜合嚟講都優於同行。不過，因為如此而照老曹講：「恒生銀行距離極限已不遠，欲上層樓，也許要換領導人至得。」，啱唔啱邏輯呢？我哋一致認為唔多明白噃。
JackWelch領導GE多年，全世界拍掌，有冇分析員話因為Welch做得太好，而要求更換Welch呢？英國足球有一句格言：「唔好改變贏波球隊嘅陣容。」費格遜爵士在一九九八年帶領曼聯奪得足總盃、聯賽、歐洲冠軍盃，真係好到難以再好，曼聯有冇因此而炒咗佢？阿仙奴領隊雲格喺九八年帶領球隊攞咗聯賽冠軍、足總盃冠軍，到今季，又已經攞咗足總盃，星期四凌晨贏咗曼聯，做埋聯賽阿一，唔通阿仙奴竟然會對雲格講：「阿仙奴已到最好成績嘅極限，我哋要換領隊？」凡球賽都係：輸波領隊被炒，贏波領隊繼續做，從來冇話贏波領隊教練換人嘅。
恒生銀行已係贏緊波嘅隊伍，點解老曹咁聰明嘅人會話「也許要換領導人呢」，我哋成班笨人冚扮爛木宰羊。