「大市狂想症」終於喺上個禮拜吹到去美股，喺隻思科系統業績好過預期下，杜指周三晚急升成三個巴仙，納指更加升咗7%有多。不過個美市咁樣升法，其實都唔係好正常，尤其係美國失業率持續咁升，似係未有回落嘅迹象，美股係咁升到巴巴聲，如果到時美國經濟真係唔掂嘅話，都唔知點算。
港股上周破唔到萬二關，氣氛變得麻麻。恒指升到上去11700點樓上嘅時候，已開始有公司出嚟做伸手派喺市場抽水，但對於部份極受散戶投資者歡迎嘅股份，就完全無任何影響，就好似隻之前叫華利資源嘅國新集團（1215）咁，唔聲唔聲已經返番去4仙水平，呢隻股仔喺去年底做完債務重組之後，由新嘅上海幫大股東持有，聽一位有跟開呢隻股仔嘅行家講，個大股東喺國內非常架勢，手頭上重揸住好多好嘢，話會有好多嘢跟尾，叫伏勝多加留意。
不過隻股由新大股東揸咗唔係好耐，無前科可循嚟睇，都好難話隻股掂唔掂，不過若根據隻股嘅交易額升至去30億股嚟睇，好似真係有啲嘢會發生咁。
除咗隻國新集團之外，上個禮拜升得最燦爛嘅相信要數隻光通信國際（603），就單單上兩個禮拜，隻股就已經停咗兩次牌，兩次嘅原因都係同集資有關，不過第一次用發售窩輪嚟籌旗，第二次就發咗啲可換股債畀「誠哥」同埋「殼王」，如果投資者將所有嘅窩輪同埋可換股債換晒做公仔紙嘅話，光通信就已經可以喺今次「骨」到成4億幾嘅現金。伏勝估佢哋今次攞到啲好嘢返嚟做，如果無估錯嘅話，今次佢哋極有可能會將所籌集到嘅錢用嚟斟單筍嘢，所以值得再將光通信呢隻股放番喺個觀察名單上面。
伏勝