張燊悅給人的形象一向是個開心女孩，這與她每次皆以色彩繽紛的服裝亮相不無關係。而今季她與大部份女孩一樣，鍾愛有民族風情的波希米亞服飾，布滿她衣櫃的，便全是這類服飾。
藝人的衣櫃可以說是她們的秘密之一，由於經常要出席公開場合，所以會預先準備適合的服裝在衣櫃中，以便每次出現時，都能突圍而出。而形象走青春活潑路線的張燊悅，亦有她一套個人穿衣態度。
張燊悅早前應《蘋果》之邀，往尖沙嘴美麗華商場的「Circles」，看看她近半年來添置衣裳的地方，及示範她的衣櫃之選。張燊悅親自配襯的服飾，皆是今季大熱的波希米亞風情的選擇，張燊悅說：「我一向都係着啲舒服嘅衫，着咗上身可以『舞來舞去』就最好。另外有豐富顏色嘅衫好啱我心水，好似我今日呢啲紮染色彩嘅衫，我着咗上身即刻好似置身峇里島咁，好有度假feel。」
張燊悅亦有她一套穿民族服裝的心得，她說：「我覺得着呢一類衫最忌totallook，好似包埋頭巾咁，我就唔鍾意啦；亦唔應該襯高踭鞋，最好就着凉鞋，咁樣先至有free嘅感覺。同埋我覺得着衫除咗係為扮靚外，舒服亦最緊要，所以早輪興嗰啲斜膊衫，我就唔係好buy，因為着咗上身個人成日驚住件衫走位，搞到好唔自然。」
而出乎意料之外，原來張燊悅甚少出埠買衫，她說：「喺外地買衫好多時係一時衝動，買咗返嚟會後悔，加上我想支持香港經濟，所以多數喺本港買衫。」
採訪：JessicaNgan
攝影：ChanChiLam
化妝：DeborahVaughan
髮型：AndyofChin.G
場地提供：Circles