在香港這個商業社會，藝術常予人不切實際的感覺，遑論賴以為生，就算要進修，很多人都情願將學費投資在商業管理等課程；不過，凡事總有例外，起初以陶瓷為學習興趣的Rachel（張煒詩），四年前決定正式修讀藝術專攻陶藝，其間不但和朋友開設工作坊，成為全職陶藝工作者，去年更獲得香港藝術雙年展獎項。能寓工作於興趣，相信是不少人夢寐以求的事。
記者：周麗懿
攝影：楊錦文（部份圖片由被訪者提供）
82年畢業於理工學院設計文憑的Rachel，一直從事有關時裝及製衣行業，直至六年前，有朋友叫她一起去參加陶瓷興趣班，便開始與陶瓷結下不解之緣。「其實自己都有啲興趣，所以就參加咗，以前我都參加好多興趣班活動，不過只係玩過短時間，惟獨玩陶瓷一直保持到𠵱家。」
搓搓拉拉之下，Rachel不但弄出真正的興趣，她更報讀澳洲皇家墨爾本理工大學（RMIT）及藝術學院合辦的藝術學士學位課程。「嗰時諗如果自己繼續讀興趣班嘅話，會無進步，其實我本身都無計劃諗住以後會點，讀書都只係想增加自己喺呢方面嘅知識。」她雖選擇報讀兼讀課程，但有關時裝工作相當繁重，陶瓷功課又花去不少時間，令Rachel在工作和學業上面臨人生交叉點。「嗰時大概讀咗一年左右，都想全職讀書，咁啱公司裁員，賠償方面都唔錯，於是索性就全職讀。」
Rachel覺得進修後最能夠啟發她的創作，是最大的轉捩點。「以前玩陶泥當興趣咁玩，鍾意做乜就做乜，無乜特別心態，只當公餘時間Relax吓。讀RMIT就完全唔同，首先導師會定咗一啲嘢要你去跟，令我在思考上諗多咗嘢，亦要Research，對周圍事物亦會特別敏感。」苦心讀書，最大回報和鼓勵，莫過於去年成為香港藝術雙年展十大優秀得獎者，令Rachel對陶藝創作的心志更堅定。「個展覽兩年一次，約有幾千人參加比賽，其中不少係相當有份量嘅老師傅同導師，所以獲獎的確係一個好大嘅鼓勵，我會做更多好嘅作品，要繼續努力，所以我諗我唔想再返時裝界做嘢。」
現時Rachel和拍檔在工作坊，約有30個學生，總算薄有收入，她亦會在藝術中心、政府的特殊學校和技能中心當導師，又會應邀講Talk，分享陶藝創作的經驗。「全身投入之後，相比以前做時裝界，生活水準的確低咗，不過我想做番自己喜歡做嘅嘢。」事業上，會向創作和教授方面努力，不過Rachel亦未滿足，未來更想報讀藝術碩士課程，希望能夠在這方面更上一層樓。
姓名：張煒詩（Rachel）
現職：與朋友開設陶素工作室，另在藝術中心、特殊學校及技能中心任陶藝導師
進修歷程：
1980至1982年：香港理工學院設計文憑
1982至1985年：香港理工學院Fashion&ClothingTechnology高級文憑
1998至2001年：澳洲皇家墨爾本理工大學學士學位（藝術）課程──主修陶藝