前晚老牌男歌手EngelbertHumperdinck喺灣仔會展開演唱會，賭王何鴻燊都有去捧場。佢入場前同記者傾偈時，不忘揶揄李國寶，佢話：「佢真係犀利，個女朋友叫佢做Baby，我都係叫太太做Honey咋，不過我唔會妒忌佢，反而好欣賞佢，佢𠵱家就威啦，日日報紙都寫佢，我都未試過呀。」
賭王重大爆李國寶嘅女性密友唔止廖碧欣同梁樂華，賭王好得戚咁話：「有啲你哋冇機會check到啫。」最後賭王望住自己對鞋自嘲咁話：「我冇佢咁威，對鞋唔係訂做，冇名嘅。」
另外，鄧永鏘噚日喺佢中環間雪茄店開幕時亦話：「我覺得李國寶處理呢件事處理得好大方，其實唔偷情都做唔到嘢啦，好多高官都偷情，你諗吓，一個人浪漫先有幻想，有幻想先有傑作。」
楊千嬅同古天樂套《乾柴烈火》上月十九日開畫至今，收咗超過千三萬，好自然佢兩個呢排都會多咗片商搵佢哋拍戲。其實鄭秀文同楊千嬅演喜劇嘅方法好似，但佢兩個嘅片酬就差一倍有多，之不過佢兩個做部部戲都係一個演法，馮仁昭都開始覺得悶。聽講楊千嬅拍《乾》片嗰陣，葉偉信想改變吓佢啲演法，但佢好堅持。哈！做演員太短視，蝕底都係自己。
張艾嘉噚日出席「婦女事務研討會之半邊天下」，問到佢有冇打電話慰問張曼玉，佢話：「雖然我同佢都熟，但唔係成日聯絡，我相信佢會知點去面對。」講到娛樂圈夫婦聚少離多比較易離婚，張艾嘉好唔認同咁話：「呢啲好睇個人，Maggie（指張曼玉）唔係事業心好重嘅人，始終呢行每個人都想做到最好，其實要維持婚姻，都包括埋工作。」
葉璇、楊怡同吳美珩噚日一齊去咗銅鑼灣Sogo，幫一間叫做MISSSOFI嘅鞋店剪綵。葉璇噚日紮起兩條孖辮，着住件背心，少女味十足，佢剪完綵之後即刻喺現場攞咗幾對鞋。葉璇話：「我過幾日會返美國養腰傷，大概兩個禮拜之後返嚟。」
無綫噚日喺尖沙嘴嘅美麗華酒店舉行《中華狀元紅》記者會，主持之一嘅鄧梓峰因事缺席，剩得黃德如一個人撐場。黃德如話吸取咗舊年嘅經驗，有信心會做得重好，雖然個節目係逢周六晚上播出，可能收視冇平日咁好，但黃德如覺得做主持嘅盡咗自己責任就夠，唔需要擔心收視嘅。
大S（徐熙媛）自從拍完台劇《流星花園》後，喺台灣就更加紅到爆燈，最近有台灣媒體爆出，話大S同男友藍正龍已經同居。
報道重話佢男友喺大S屋企嘅地位低微，不但只俾大S一個人使，重要俾佢個妹同媽咪點，所以大S成日公開話怕男友都唔係事實，但大S噚日就好勞氣否認，又唔認同男友同居。