【本報訊】立法會助理秘書長吳文華出席任何場合，總是明豔照人。由公務員過檔立法機關，圍在身邊的「蜜蜂」一大群，有高官也有政客。這位電眼美人平日工作賣力、言笑晏晏，其實已當了二十六年的單親母親。但笑臉背後不是淚水，而是與孩子一同成長、一同掙扎的寶貴經歷；還有沒了丈夫、依然可以活得精采的人生。 記者：蕭煒春
全家人一起慶祝母親節，吳文華（Pauline）自為人母後，只嘗過一次這樣高興的團聚。當工程師的丈夫在兒子五歲、女兒一歲多的時候，突然因癌病離世。二十五歲的年輕母親，從此與兩個稚齡子女相依為命。
「嗰陣時都幾辛苦，又要照顧我先生，希望令佢感到自己唔係喺度等死，又要睇住啲仔女……」說起二十多年前的往事，Pauline忍不住哭了。丈夫由發病至離去，Pauline只有半年時間去接受及籌算。「嗰陣有位神父同我講，叫我唔好諗得咁負面，可能有更美好嘅嘢嚟緊，嗰一刻我突然醒悟要諗嘅係將來嘅事，我嗰時先二十幾歲，將來重有好長嘅路。」
她首先與子女由美孚新邨的千五呎單位，搬往同邨五百呎的小單位；然後報讀了很多個校外課程，包括她喜愛的藝術，以及有助謀生的法律，「差不多所有同法律有關嘅校外課程我都讀晒。」
Pauline的想法，有異於一般單親母親，「有啲人覺得自己最大嘅責任就係湊大啲仔女；我覺得唔係，我覺得係應該同佢哋一齊成長，你唔可以因為咁就停咗喺度。」
既要上班又要上課，單親母親的生活非常忙碌。由於給予子女的時間不多，要維繫感情，Pauline強調重質不重量。將簡單問題複雜化是Pauline與子女溝通的方式，「你以為細路仔識乜嘢咩！其實唔係，譬如要買某樣嘢，我會不斷問佢哋點解要買、有咩需要、要嚟做乜？等佢哋不斷思考，識得分析，識得自己諗嘢。」
懂得分析，還可以令他們明白，父親的離去，不等於這個家從此不完美。「小朋友唔識諗，就會覺得冇咗爸爸會俾同學睇唔起，從小就成日同佢哋傾偈，等佢哋明白，冇咗爸爸唔應該會阻礙佢哋成長，唔應該因為咁得唔到快樂。」
子女的感受，她一向看得很重。Pauline天生娃娃臉，加上年輕又樂觀，裙下之臣絡繹不絕。她坦言，這些年來，有好些男士曾透露希望可以成為孩子的父親，除了自身的考慮外，子女的想法令她多了一重顧慮，「啲細路可能會擔心，新爸爸會對佢哋唔好。」
Pauline剛度過五十一歲生日。當律師的長子已經三十一歲，幼女在英國拿了碩士銜頭後，現時在港從事考古工作，兩母女剛剛加入了「生命天使」行列。子女成材，當媽媽的依然拚命工作，去年還修讀了清華大學的課程。單親媽咪永不言倦，因為她依然堅信，一定要與子女們同步成長，「咁先至會得到仔女嘅尊重。」