相信好多朋友曾經去過深圳歡樂谷一期玩過，而耗資4億人民幣、佔地18萬平方米嘅歡樂谷二期，剛於上周開放咗喇！由於歡樂谷二期有8大主題樂園，各適其適，又有最新嘅機動遊戲機，所以小記今次找一對小情侶，替其中最刺激嘅遊戲機作個別評分。
記者：梁煒健 攝影：楊錦文
模特兒：MaggieCheng、DickSiu
喺歡樂谷二期8大主題樂園之中，以香格里拉森林有最多刺激好玩嘅機動遊戲機，其中以人手拉拔嘅「肯配古塔」較為特別；遠睇以為呢座係一部跳樓機，其實係一座得意觀光塔。玩法係塔嘅四邊共有8個座位，以兩人一組，以鬥快時間上到塔頂為優勝者。座位會360°慢慢轉動攀升，而遊客需用力把座位中央嘅麻繩向下拉，座位就會自動上升；如果手一鬆，整個雙人座位就跌落去，而整個塔高10米，鬥快上塔時間為2分鐘。
測試結果：由於以人力拉郁整個卡座，所以女性較為吃力，最好同男仔一齊坐，由男性拉繩而女性則可以「他他條條」睇四周風景。由於係慢上慢落，刺激度唔大，就算有畏高嘅朋友都唔怕。
驚嚇度：（男）0分（女）4分
用力度：（男）5分（女）10分
「雪山飛龍」係香格里拉森林嘅重點項目，亦係中國首座以懸掛式設計嘅過山車（香港都冇該設計），真係小啲膽量都唔敢坐上去。全長662米，座位20個，在35米高空以80公里高速行走，又連續做多個翻滾迴旋，需時都只用咗93秒嘅實際運行時間，難怪男女model玩完後都腳仔軟。好激刺！
測試結果：由於雙腳離地Fing住嚟玩呢個過山車，女modelMaggie玩完之後腳仔軟行唔到；而佢至驚就係過山車做多個翻滾迴旋動作嗰陣。
驚嚇度：（男）9分（女）10分
可嘔度：（男）8分（女）9分
位於颶風灣主題樂園嘅機動遊戲「激流勇進」，遊客須坐一艘旅遊船，經過一間罐頭廠，然後從26米高嘅塔頂沖落水面；雖然沖落水面只得數秒鐘，但由於落水時水花又勁又高，無論有冇着雨褸船上嘅人都一定濕身。
測試結果：由於激流勇進係現時全世界落差最大嘅水上遊戲機，落差有26米，所以遠比海洋公園嘅滑浪飛船更勁，就連企喺橋上睇嘅觀眾都會隨時濕身，所以玩嗰陣最好帶多件T恤及短褲作替換。
驚嚇度：（男）7分（女）8分
可嘔度：（男）9分（女）8分
位於香格里拉森林以一棵古老風水樹作外形嘅遊戲機「迷旋」，樹洞中有一個石頭圓盤，遊客須坐上圓盤上參與，可坐10人。
測試結果：由於圓盤會愈轉愈快，加上又有大型滾球撞向你，所以一不小心定力唔夠，唔使兩秒就會GameOver。
刺激度：（男）4分（女）5分
救援駝峯線其實係一套電影，港譯《迷失地平線》，而呢個遊戲參考其中情節，遊客要完成救火任務。遊戲區分為6條賽道由6組人同時比賽，而每組兩名參賽者需盡快於3分鐘內，用人力一上一落把古老救火車推動到撞機現場，然後用老式噴水槍撲滅機內火種，撲滅後即時返回起點才算勝利者，愈多人玩作團體競賽就更加好玩。
刺激度：（男）6分（女）7分
可玩度：（男）8分（女）8分
電話查詢：（86-755）6949168
地址：深圳市南山區華僑城僑城西路
開放時間：早上9:30至晚上9:00
票價：成人?120，小童?60。
交通：從羅湖商業城地下巴士站，乘坐鵬運觀光巴士到歡樂谷，車程約40分鐘，車費為?5（大小同價）。若乘的士從羅湖關口前往，車程約30分鐘，車費約?50。