被外國傳媒譽為「香港良心」嘅前任政務司司長陳方安生，雖然已退休一年多，但佢嘅受歡迎程度卻有增無減。
最近城市大學應用社會科學系做咗個名為「母親的心事」嘅調查，訪問咗二百一十二名母親，問佢哋最崇拜嘅女性人物係邊個，共有十五位女性入圍，包括陳方安生、特首夫人董趙洪娉、保安局局長葉劉淑儀、立法會主席范徐麗泰、母親、戴卓爾夫人、德蘭修女、「好姨」薛家燕、蕭芳芳、「肥肥」沈殿霞、戴安娜王妃同英女皇等。
結果，陳方安生擊敗所有對手，成為一眾母親最崇拜的人物（見表）。負責呢次調查嘅城大應用社會科學系助理教授黃成榮解釋，陳太一直以來在各方面都做得好出色，不但事業成功，而且同丈夫恩愛，又愛錫仔女，同埋孝順自己母親，可謂係一個全能女性。
緊隨陳太後嘅係受訪者的母親，同埋德蘭修女，而排第六位嘅好姨薛家燕對於自己獲選，就覺得好高興同榮幸，佢勉勵單親家庭父母要多啲同仔女溝通，唔好咁易氣餒。
至於董太、葉劉淑儀、蕭芳芳、肥肥沈殿霞同英女皇就十大都唔入。
E-mail：