公關靚女嘉芙安排兩位記者訪問客戶公司嘅CEO，因CEO有一個重要會議開極都開唔完，大家惟有在會客室等候。等候期間，閒談之際，兩位記者竟然大吐苦水。
記者A啱啱轉報館，講番上一份工，記者A話：「初入行以為記者要分析，寫得好，點知唔係。上司只要求我去刮料、搵料，甚至買料，最好就係做住一陣卧底。我寫報道嘅文字好壞，冇人理，橫掂上司會改到七彩，佢又識得寫開頭，作埋結尾，好似身在現場咁。佢修改過後嘅古仔的確睇到我津津有味，一定吸引讀者，可惜唔係真嘅！」
記者B在另一報紙工作，正積極搵工轉，原來佢嘅經驗同記者A相同，令佢懷疑自己喺新聞系讀書有乜鬼用，啲教授好似住喺天堂，不食人間煙火，都唔知香港現實係點樣嘅！
嘉芙聽到，連忙說明：「喂！唔該、唔該，CEO講啲嘢，請你哋如實報道，唔好返去加鹽加醋，屈得就屈呀。」兩位記者都話：「我哋一定照實寫，不過如果老頂話古仔枯燥無味，冇人氣，可能唔登；請你同CEO講，佢要講番一啲過癮嘢、趣味嘢至得！」
邊度有咁多過癮嘢、趣味嘢吖，以事論事就話悶，講得詳細就話太過technical，嘉芙為之𢱑晒頭，惟有叫CEO盡量輕鬆化、娛樂化，避免知識化。嘉芙問左丁山以後點算，吾欲無言。