朱茵事隔多年再當歌手，她今趟自資六位數字金額出唱片，全因她要音樂自主，不想重蹈從前當歌手唱得冇癮的不快經歷。
朱茵想起當年出唱片，一切任人擺布，面對一堆她不喜歡的歌，她常用「冇癮」兩個字來形容當年做歌手的感受。要做一個有誠意歌手，朱茵說惟有靠自己，自資出碟。
朱茵日前接受訪問時說：「以前唱片公司只會放晒心機搞形象，完全忽略音樂，又唔需要我唱得好，總之我錄好啲歌就得，公司話乜就乜，完全冇話事權，啲歌我根本唔鍾意，你叫我點可以唱得投入。」
朱茵續說：「當時做歌手真係做得幾冇癮，外間只當我係跟風嘅歌手，即係人出碟我又出。當時覺得唱歌唱得有遺憾，已經立下心願，希望有朝一日可以再圓歌手夢，做一張見得人嘅唱片。」
市道不景仍有膽量自資出碟，有人覺得是冒險，但朱茵卻毫不擔心，她說：「我唔係傾家蕩產，又唔係要變賣層樓幫自己出碟，人哋用積蓄投資炒樓、買車償心願，我就只係用積蓄圓歌星夢，冇乜唔妥。況且𠵱家唔好嘅嘢都可以好賣得，我用心機去做，冇理由會賣得差過佢哋。而且我出碟只係還心願，與其衰喺人哋手上，不如衰喺自己手上會甘心啲。」
朱茵男友黃貫中（Paul）今次親自為女友的唱片任監製，情侶檔出碟，朱茵笑說男友對她要求嚴謹，她唱得不好，阿Paul會單刀直入批評她。朱茵說：「我有時唱得唔好，佢不留情面咁話我唱得好難聽，但我又唔會嬲，歌手係應該聽監製話，我哋分得好清楚，所以合作期間冇拗撬。」
採訪：盧雪琪
攝影：何國豪
髮型：Jason（ILCOLPO）
化妝：KarenChoi
服裝提供：Sisley、Guess