鄭伊健、王敏德（Michael）同張達明最近合作拍咗套新戲《當男人變成女人》，三個大男人要變身做女人，一嘗女人心理同生理變化，好似細膽、怕事，甚至月事等滋味。伊健、達明同Michael三個男人喺戲入面着住孖煙囪，互相昅住對方褲襠，睇吓「何B仔」重喺唔喺度。
而方子璇就飾演達明女友，達明未變女人前，係一個刻薄嘅大男人，成日蝦子璇。有次子璇發現自己有咗BB，點知達明只係畀一百蚊佢，叫佢去深圳落咗佢喎，一百蚊車錢都唔夠啦！
好彩後尾達明變做女人，知道女人嘅苦處，先至浪子回頭，一對情侶大團圓。子璇話如果現實生活中有個咁衰嘅男友或者老公，一定即時飛咗佢。
伊健都話拍完呢部戲更加了解女人，而佢最錫嘅就係媽媽，嚟緊母親節，佢準備全日陪媽媽。不過年年佢想帶媽媽出去食餐好嘢，鄭媽媽都話怕人多唔方便，寧願留喺屋企自己煮喎。
陳慧琳日前喺台灣拍國語新歌《愛上一個人》MV，拍攝中途突然喊咗出嚟！
話說Kelly唱到歌詞「你不要說，愛這種事，雖然美麗，千萬別當真，你知道下一秒鐘，誰也沒準兒。」時，突然忍唔住眼淚直流，令所有工作人員大為緊張，但佢都堅持拍完成個MV，但因乜鬼Kelly咁感觸呢？。
聽日係母親節，F4嘅言承旭今日嚟香港舉行蓋印會後，即晚就會趕返台灣，準備做個孝順仔，聽日陪媽媽共度佳節。言承旭除咗會同媽媽食飯之外，重已經買咗張按摩椅送畀媽媽，言承旭話：「我會在母親節當天將按摩椅送給媽媽，這些年來我媽媽真的很辛苦呢。」
方逸華最近頻頻出現蘭桂坊，佢前晚十一點半左右又同一男一女朋友蒲蘭桂坊，佢話因為六叔同佢一齊食完飯就返屋企瞓先。方逸華話：「等陣飲完嘢就返去，冇下場。我每朝六點起身做運動，乜運動都做，瑜伽都有，玩到八點返公司。」
陳復生同麥舜銘兩夫婦早前去咗北京，出席中國政法大學建校五十周年慶典，呢間中國政法大學培育咗好多中國司法機關嘅首長級官員，佢哋今年校慶，特登邀請一班世界各地法律界權威參加，而陳復生同麥舜銘就係以超藝國際文化基金會會長同主席身份出席，佢哋話覺得好榮幸喎。
韓國天后朴志胤今晚會喺台灣舉行個唱，佢噚日接受台灣傳媒訪問，問到同監製朴震榮，重有韓國組合前H.O.T.成員Kang-Ta嘅緋聞嗰陣，朴志胤竟然大爆朴震榮已經結咗婚，同老婆感情重好好。至於Kang-Ta，朴志胤就話：「我同H.O.T.五個都識，但絕對冇拍拖。」