港股噚日反覆下跌54點，收報11645，成交縮至86.76億元。好友似乎唔想喺周末前入市接貨，買盤較為薄弱，但亦唔見淡友狠沽，好淡雙方都呈觀望狀態，而最值得留意係即月期指未平倉合約持續上升，意味好友未開始平倉，甚至繼續增持好倉。
意科控股（943）噚日停牌，公司表示要供股集資。Cookie話，據聞大股東已經班到水，可能會大幅折讓供股，若果其他股東唔供股，大股東可能額外認購增持，兼攤薄其他股東股權，變相將貨源歸邊。意科由00年高位19元水平跌至現時0.115元，上面蟹貨當然多不勝數，如果唔透過供股攤薄其他股東權益兼震出蟹貨，實在唔易炒上去。
天鷹電腦（1129）下月中就上市半年，即係話可以配股集資。據聞此股上市時，由於市場環境唔係咁好，集資金額未符預期，所以禁售期屆滿後會好快配股集資。ｉ師傅話，此股短期內將有熱身，部署配股集資，現價搭順風車有得諗。
光通信（603）發完3.5億元可換股債券後，股價急升，突破債券行使價0.20元。其中50％可換股債券配畀和黃（013）同德祥企業（372），唔怪得先前此股有高盛呢類大行捧場，市傳此股後市起碼見1元。不過，光通信蟹貨絕對唔少，要推高至1元相當困難，但黑客話此股幕後大有來頭，有財力兼有面子，否則又點會引到和黃入股呢？ 阿虎