經過多日來觀察，小初對華德豐（297）都係維持番停牌前嘅判斷，就算有貨蝕緊錢，都要沽出計數。
華德豐除咗復牌首日炒過上53仙，之後就一直浮浮沉沉，噚日微跌1.16％，收42.5仙。雖然一直有唔細成交，但橫睇掂睇都係得過「頂」字。
經紀陳意見相同，佢重話飛天朱話搞衞星咁耐，到今時今日只不過係擺咗唔夠4％嘅香港衞星股權落去，股票已印咗好多，錢又畀咗好多，以會計角度睇，4％你話點夠數？
至於大埔個地盤，睇怕未來一年都唔慌起得成，因未來一段長時間，公司都唔會有大量現金流入。此外，個project大到咁，但玩咗咁耐都唔覺有芬佬參與。經紀陳話，有個客買華德豐坐艇，亦叫佢投降。
另外，原本小初以為光通信（603）一直由上海幫睇住，但噚日竟然見到殼王出現，先至驚覺原來殼王已經同上海幫行埋好耐，今次小初消息唔夠靈通，認真唔好意思。 慕容小初