今個禮拜關刀行貨開賣「波多黎各第三代」，排隊黨又準備打崩頭。其實炒賣波鞋玩具已成社會現象，鏗鏘集遲早會報道。記得當年紐約有個黑人為搶對籃球鞋而拮死人，引嚟極大迴響，冇記錯對鞋亦係關刀。上個禮拜賣「衝勁」，屯門「皇室屋」要排隊，班細路重因爭買對11號鞋拳來腳往，可謂奇景。
波鞋占雖然份正職忙到暈，但仍不忘度橋入貨，每次收到風行貨幾時賣，就會同拍檔開會研究點樣入貨，例如邊處可執死雞冇人排隊，或同其他拆家以物易物。最近一鋪代表作，就將早兩個禮拜極搶手嘅馬年同個日本仔交換，竟然可以3對馬年換對第一代烏粉，日本仔重要補多一萬日圓畀佢。
第一代烏粉高峯期時值成八千幾港紙，重加多六百蚊現金，波鞋占呢鋪真肥仔。三對馬年原價只值千六、七蚊，𠵱家賺多七千幾。點解每次關刀一推出新貨就咁多人排隊，理由好易明白喇。
主持人：大食Jack
八卦熱報：