美股周三勁升後，前晚出現回吐，但港股噚日沽壓唔算大，恒指企住10日線收市，收11645。
一周埋單，恒指跌152點，跌幅1.3%，結束連升3周嘅強勢。恒指本周未能乘勢突破萬二關阻力，的確令趙飛雲有些少失望。不過，港股由4月中10600水平升至周四11962高位，升幅逾1300點，其間未出現過明顯調整，技術頗為超買，現時先作整固，其實亦算合理。估計恒指短期會喺11600至12000形成橫行區，伺機突破。
趙飛雲下周投資策略基本上冇變，如果恒指回落至11600附近，會先買1注恒指Call輪9045，跌至11500附近會買第2注，如果恒指連250日線（現處11462）都守唔住，就全部沽出計數。嚴格而言，恒指如果要補番11497-11577嘅上升裂口，唔係一個太好徵兆，反映市底並非想像中咁強。
先前帶領大市上升嘅地產大藍籌，新地（016）噚日跌至20日線（現處65.50）反彈，收66.25元，長實（001）走勢亦大致相同，恒地（012）走勢較弱，但亦能守住20日線36元。假如今次港股升浪未完，大藍籌20日線不應失守，亦即係話地產股調整接近完成，可發揮支持大市作用。 趙飛雲