聽日就係母親節，重未諗到如何同媽咪慶祝嘅話，不如帶埋媽咪一齊去Shopping，小記知道本周吉之島有母親節精選特價貨品，其中如矜貴嘅即食冰糖燕窩重係好抵買㖭，送畀最偉大嘅媽媽就至啱。另外吉之島全線更做緊泰國食品節，除有泰國唔同嘅特色食品之外，重有精采嘅歡樂繽紛騷睇㖭！有嘢買又有餘興節目睇實行令到媽咪可以盡興而返，過一個特別又難忘嘅母親節。
記者：陳冰麗 攝影：楊錦文、陳冰麗
ImageGirl：Karen
鮑魚價錢唔平，未必人人送得起，取而代之送以鮑魚汁做成嘅麵，呢份心意媽媽應該都唔會介意，綠色盒裝係鮑魚蝦子麵，紅色盒裝係鮑魚金腿麵，每盒內分別都有八個麵，由即日起至下周三，凡購買兩盒即送多一盒。
自己媽媽煮嘅餸始終係最好味嘅，送佢呢款鮑魚XO醬煮餸，佢又開心時，自己又有得食，一舉兩得。平時一樽鮑魚XO醬都要成五十蚊，家陣每樽平四成半有多，Jcard會員每樽再平$0.6，咁抵買，趁手入定貨作為日後用都抵。
媽媽照顧一家起居飲食咁辛苦，送佢燕窩補補就最啱，即食燕窩一開就食得，方便唔使除雜毛及燉等繁複工序，媽媽收到實開心。白蘭氏冰糖燕窩品質一向有保證，平時要二百零蚊盒，家陣二百蚊有找，相當抵㗎！每盒有6樽即食燕窩。
用猴頭菇煲湯啖湯又甜又清潤，食埋猴頭菇更有益，佢含有不飽和脂肪酸，有助減低血液中膽固醇，增強胃部及消化系統功能，送畀媽媽煲湯一家人啱飲。綠之聖猴頭菇每包約一磅重，現只賣二百鬆啲，好超值㗎！
猴頭菇之外，呢款靈芝亦係送畀媽媽嘅首選，靈芝藥用價值高，有降血壓、降膽固醇等功效。一盒約重250克，可以煲湯五、六次。另外，重有禮盒裝花菇亦係$68盒，較少見嘅舞茸菇，每盒$88，全部都係買一送一。
清雞湯用途廣，煮餸、煲湯都可以，平時一公升紙包盒裝閒閒哋都要十五個零一盒，家陣兩盒只係二十蚊鬆啲，除番每盒十一蚊有找。
間唔中飲一小杯梅酒有行氣活血功效，新推出無耐嘅紫蘇梅酒，色澤粉紅，飲落更有另一番味道，成份除咗砂糖、釀造酒外，更加多咗紫蘇成份，令味道更加清香，原價要$123樽，現只係$105樽，更加超值抵飲，而每樽紫蘇梅酒有750毫升，內有五至六粒日本酸梅，記住食埋更有益。
龜苓膏有清熱下火功效，經常要入廚嘅媽媽食用可以降吓火。買兩個有特惠價，三十蚊有找，但如果買一個則要$18.9，所以最好至少買兩個就最實惠。
呢款禮盒裝即食印尼燕窩雖然跌幅唔及冰糖燕窩咁大，但勝在係禮盒裝送禮夠大方，而且價錢又大眾化，一盒同樣有6樽。如果閣下係持有吉之島Jcard，更可以特惠價$85購買，買得愈多重慳得多。
除咗母親節精選特價貨品外，由今日至下周三，全線吉之島亦做緊泰國食品節，有嘢買之餘，重有歡樂繽紛騷睇兼且可以參與有獎遊戲，贏取精美禮品。
小貼士：
1.歡樂繽紛騷會於今日下午二時、四時及六時喺將軍澳東港城商場一樓中庭內舉行，另明日下午二時及四時亦會於大埔超級城美食坊舉行，精采節目包括有泰國傳統民族舞蹈、現代歌舞匯演、傳統諧趣拳擊、魔術表演等。
2.而喺展銷期間，購買泰國食品滿$50(可累積發票)，憑當日發票更可換領泰國精美禮品一份，數量有限，送完即止。
$6-$13盒
泰式甜品又豈止椰汁西米糕，喺泰國食品節展銷中有更多元化泰式糕點供選擇，其中包括有海底椰蛋糕、泰式綠豆糕、綠豆西米糕、由火龍肉做成嘅珍珠大菜糕、泰式迷你沙翁等等，全部都只係$6-$13盒。
$3條
泰式冰條相信較少機會可以食到，難得有機會品嘗必要試試，冰條以鮮果汁加冰製成，重係即場製，更加新鮮，入口涼透心，冰條有三種味道，分別係芒果、青檸及椰子味，各$3條，都算抵食。
$1.8/100克
金枕頭係榴槤中之極品，所以售價都會略為貴啲，正宗金枕頭至少要十至十零蚊磅，適逢做緊泰國食品節，現只需約八個零一磅（一磅有454克），質素相當唔錯，食落又甜又軟綿，榴槤迷必要試。其他精選水果重有水仙芒、皇帝芒、山竹、人參果、蕉仔、石榴等等，全部均由泰國空運抵港，質素有番咁上下㗎！
$1.4/100克
泰式番薯喺外形上同我哋食慣嘅番薯有些微唔同，泰式番薯較長及幼身，品種唔及祖國貨多，搵到嘅只係紫心番薯，但質素都唔錯，蒸熟都好粉綿。