標緻車廠繼於較早前向外公布全新嘅307SW後，最近又為307車系增添一位新成員；佢嘅外表不但與307SW相近外，頗實用嘅車廂空間更成為賣點之一。呢位新成員係邊個？之唔係307Estate囉！呢款307Estate其實係以307SW作為設計藍本，故此兩者嘅賣相十分相近；但由於307Estate擁有長達4420mm嘅車身，而軸距更比307SW增加100mm（達2710mm），從而能營造出一個寬敞闊落嘅車廂空間。車廂方面，除座椅可按需要而收摺放平，以增加尾廂嘅載物容量之餘，座椅嘅承托力又見不俗，乘坐倍見貼服舒適；設備配搭又見齊全，兼備有多個安全氣袋作保護，以保障車上乘客嘅安全。
然而，廠方亦為307Estate提供有多個機械配搭，當中包括有1.4公升（77匹）、1.6公升（112匹）及2.0公升（140匹），從而迎合不同用家嘅需要。未知香港代理方面，有無興趣將之引入呢？