近期，本港自殺成風，有父母因一時困境而攜子女自盡。對於意圖輕生的人，新鴻基地產（016）副主席郭炳江接受本報訪問時認為，只要仍有選擇就不應放棄。「你自己開唔開心、你自己積唔積極、你點樣去面對人生，選擇權永遠喺你度。個選擇權喺你自己度嘅時候，就唔可以放棄！」
他又說：「順境、逆境人人都有，邊個冇？」最重要是學懂珍惜，明白自己有選擇權，可以放低。
不論貧富，一樣有失意時。郭炳江說父親郭得勝過身時，對他打擊甚大。「嗰陣時，返到寫字樓都冇心機，成日捉住大佬（郭炳湘）走去馬會、寶雲道跑步，兩兄弟一齊跑步，有時傾吓偈，做自己鍾意做既嘢，高爾夫球都係嗰時開始學。」
雖然傷心了好一陣子，但郭炳江仍可重拾心情繼續生活。他相信，遇上人生的大難題最緊要「懂得放低」，不要將問題放得太大；要「學習如何珍惜所擁有」。當你懂得珍惜時，就可以看到其他選擇，看到尋死以外的其他生路。
郭炳江相信，面對困境，意志是很重要的。他覺得香港新一代面對挫折的能耐較上一代差。「嗰時有暴動、有銀行風潮，72、73年有石油危機，夜晚要熄燈，你見慣咗，自然捱捱吓就不覺一回事。要有嗰種環境、鍛煉，你至知道、受得……今日？好難怪後生仔，香港由82、83年一路順風順水，佢哋未捱過。」他建議年輕人揹背囊旅行，體驗生活。
自從金融風暴後，經濟環境日差，而自殺輕生的情況日趨嚴重。有人埋怨特區政府政策失當、有人歸咎傳媒報道鼓吹。郭炳江同意這些都是部份原因。以傳媒為例，他認為除了報道事實外，應該再做心理分析，「有晒正面、負面的看法。」
不過，他認為最重要的是不要為自己找藉口。「𠵱家大部份人想搵個理由，而呢個理由係同佢自己無關，將所有失敗原因怪於一個人、一個目標。」政府最近宣傳高官問責制，但郭炳江就提倡「自己負責制」。與其不斷問「Why」（點解），不如問「Whattodo（做甚麼）？」
對於自殺年輕化，郭炳江認為父母要負上責任，「父親教我哋嗰時，係19世紀，道德觀係嗰個時代；我哋喺20世紀長大，𠵱家要教21世紀嘅小朋友，你重係用19世紀嘅方式，梗係追唔上時代！」不過無論時代如何轉變，他說有些東西是永遠正確的，就是用多一點時間，與孩子多溝通一點。
說易行難，若真的有人在他面前嚷着要自殺，可以怎辦呢？他說：「佢想人了解。」所以最佳方法是用多些時間傾，事後幫佢祈禱，「同情係好，但幫唔到佢；反而同佢傾偈，佢會感受到。」
正如郭炳江說，由於從未經歷過，所以不但是年輕人，就算30過外的成年人，面對逆境時亦不懂面對，「自己亦經過，有時睇嘢亦都好似樣樣好失望、好灰，但你學識同人傾吓偈，向樂觀方面諗，愈諗便愈多生路，唔會係死路一條。」
記者：劉碧思
攝影：梁鑑章